அதர்வா நடிப்பில் சமீபத்தில் வெளியான ''ஈட்டி''திரைப்படம் சூப்பர் ஹிட் ஆனதால் அவருடைய அடுத்த படமான 'கணிதன்' படத்திற்கு நல்ல எதிர்பார்ப்பு ஏற்பட்டுள்ளது. மேலும் இந்த படம் விஞ்ஞான சம்பந்தப்பட்ட திரைப்படம் என்பதால் இளைஞர்களிடம் பெரும் வரவேற்பு இருக்கும் என எதிர்பார்க்கப்படுகிறது.

இந்நிலையில் இந்த படம் நேற்று சென்சார் செய்யப்பட்டது. இந்த படத்திற்கு சென்சார் அதிகாரிகள் "U" சர்டிபிகேட் அளித்துள்ளனர். எனவே தமிழக அரசின் வரிவிலக்கு இந்த படத்திற்கு கிடைக்கும் வாய்ப்பு ஏற்பட்டுள்ளதால் தயாரிப்பாளர் கலைப்புலி எஸ்.தாணு உள்பட படக்குழுவினர் அனைவரும் மகிழ்ச்சி அடைந்துள்ளனர். மேலும் இந்த படம் இம்மாத இறுதி வெள்ளிக்கிழமையான 26ஆம் தேதி அல்லது மார்ச் முதல் வாரம் வெளிவர வாய்ப்பு இருப்பதாக கூறப்படுகிறது. ரிலீஸ் தேதி குறித்த அதிகாரபூர்வ அறிவிப்பு இன்னும் ஓரிரு நாட்களில் வெளிவரவுள்ளது.

அதர்வா, கேதரின் தெரசா, கே.பாக்யராஜ், மனோபாலா, கருணாகரன், ஒய்.ஜி.மகேந்திரா, ஆடுகளம் நரேன் உள்பட பலர் நடித்துள்ள இந்த படத்திற்கு டிரம்ஸ் சிவமணி இசையமைத்துள்ளார். இந்த படத்திற்கு அரவிந்த்கிருஷ்ணா ஒளிப்பதிவும், புவன்ஸ்ரீநிவாசன் படத்தொகுப்பும் செய்துள்ளனர்.