ஐபிஎல் கிரிக்கெட் போட்டிகள் வரும் ஏப்ரல் மாதம் முதல் நடைபெறவுள்ள நிலையில் இந்த போட்டிக்கான வீரர்கள் ஏலம் சமீபத்தில் பெங்களூரில் நடைபெற்றது. இந்த ஏலத்தில் தமிழக வீரர் அஸ்வின், சென்னை சூப்பர் கிங்ஸ் அணியில் இடம்பெறுவார் என்று அனைவரும் எதிர்பார்த்தனர். ஆனால் பஞ்சாப் அணி அஸ்வினை ஏலம் எடுத்தது. இது தமிழக கிரிக்கெட் ரசிகர்களுக்கு ஏமாற்றத்தை அளித்தது.

இந்த நிலையில் தற்போது அனைத்து தமிழர்களுக்கும் பெருமை அளிக்கும் வகையில் பஞ்சாப் அணிக்கு அஸ்வின் கேப்டனாக தேர்வு செய்யப்பட்டுள்ளார். தமிழர்கள் மீது எப்போதும் அன்பு வைத்திருக்கும் முன்னாள் அதிரடி கிரிக்கெட் வீரரும், பஞ்சாப் அணியின் ஆலோசகருமான சேவாக் இதனை உறுதி செய்துள்ளார். அஸ்வின் கேப்டனாக அறிவிக்கப்பட்டுள்ளதால் ஒவ்வொரு தமிழ் கிரிக்கெட் ரசிகர்களின் மனதில் சேவாக் இடம்பெற்றுவிட்டார்.

அஸ்வின் தலைமையிலான பஞ்சாப் அணியில் கிங்ஸ் லெவன் பஞ்சாப் அணியில், ஆரோன் பிஞ்ச், டேவிட் மில்லர், லோகேஷ் ராகுல், கருண் நாயர், மோகித் சர்மா, மனோஜ் திவாரி, யுவராஜ் சிங் போன்ற முக்கிய வீரர்கள் இடம்பிடித்துள்ளனர் என்பது குறிப்பிடத்தக்கது. சிஎஸ்கே அணியை அடுத்து பஞ்சாப் அணியின் வெற்றியையும் இனி ஒவ்வொரு தமிழ் ரசிகர்களும் எதிர்பார்ப்பார்கள் என்பதை சொல்லி தெரியவேண்டியதில்லை.