வெற்றிமாறன் இயக்கத்தில் தனுஷ் நடிக்கும் 'அசுரன்' படத்தின் படப்பிடிப்பு இன்று முதல் தொடங்கவுள்ளது என்ற செய்தியை ஏற்கனவே பார்த்தோம். மேலும் இந்த படத்தின் ஃபர்ஸ்ட்லுக் நேற்று வெளியாகி சமூக வலைத்தளங்களில் பெரும் வரவேற்பை பெற்றது.

இந்த நிலையில் சற்றுமுன் இந்த படத்தின் புதிய ஸ்டில் ஒன்றை தனுஷ் தனது சமூக வலைத்தளத்தில் பதிவு செய்துள்ளார். இந்த ஸ்டிலில் தனுஷ், மஞ்சுவாரியர் கணவன், மனைவி போல் உள்ளனர்.

இந்த படத்தில் மஞ்சுவாரியர் நடிக்கவுள்ளார் என்ற செய்தி வெளியானாலும் தனுஷை விட ஐந்து வயது அதிகமுள்ள அவர் தனுஷூக்கு ஜோடியாக நடிக்க வாய்ப்பில்லை என்றும், அவர் இந்த படத்தில் முக்கிய கேரக்டர் ஒன்றில் நடிக்கவே வாய்ப்பு அதிகம் என்று கூறப்பட்டது. ஆனால் இன்று வெளியாகியுள்ள இந்த ஸ்டில், தனுஷ், மஞ்சுவாரியர் ஜோடியாக நடிப்பதை உறுதி செய்துள்ளது.

மேலும் கருப்பு வெள்ளையில் அந்த காலத்து ஸ்டைலில் கணவன் உட்கார்ந்தும், மனைவி நின்று கொண்டும் இருக்கும் வகையில் இந்த ஸ்டில்லில் காணப்படுவதால் இந்த படத்தின் கதை நடக்கும் காலம் சுமார் 40 வருடங்கள் பின்னோக்கி இருக்கும் என்றும் கருதப்படுகிறது.

ஜிவி பிரகாஷ் இசையமைக்கும் இந்த படத்தை கலைப்புலி எஸ்.தாணு தயாரிக்கின்றார். வேல்ராஜ் ஒளிப்பதிவில் உருவாகும் இந்த படம் இந்த ஆண்டின் பெரும் எதிர்பார்ப்புக்குரிய படமாக அமையும் என்று எதிர்பார்க்கப்படுகிறது.