వీడొక్క‌డే, బ్ర‌ద‌ర్స్ వంటి విజ‌య‌వంత‌మైన చిత్రాల త‌రువాత త‌మిళ స్టార్ హీరో సూర్య, ద‌ర్శ‌కుడు కె.వి.ఆనంద్ కాంబినేష‌న్‌లో మ‌రో సినిమా రూపొందుతున్న సంగ‌తి తెలిసిందే. ఇటీవ‌లే లండ‌న్‌లో చిత్రీక‌ర‌ణ ప్రారంభించుకున్న ఈ సినిమాలో సాయేషా సైగ‌ల్ క‌థానాయిక‌గా న‌టిస్తుండ‌గా.. మోహ‌న్ లాల్ విల‌న్‌గా న‌టిస్తున్నారు. ఇత‌ర కీల‌క పాత్ర‌ల్లో బొమ‌న్ ఇరాని, అల్లు శిరీష్ న‌టిస్తున్నారు.

తాజా స‌మాచారం ప్ర‌కారం.. ఈ సినిమాలో మ‌రో త‌మిళ న‌టుడు ఆర్య కూడా విల‌న్ పాత్ర‌లో క‌నిపించ‌నున్నాడ‌ని వార్త‌లు వినిపిస్తున్నాయి.  ఇటీవల ఆర్య లండన్‌లో దర్శనమివ్వడం కూడా ఈ వార్తలకు బలం చేకూరుస్తున్న‌ట్ల‌య్యింది. అయితే, దీనిపై చిత్ర బృందం నుంచి ఎలాంటి అధికారిక ప్రకటన రాలేదు.  గతంలో అల్లు అర్జున్‌ కథానాయకుడిగా నటించిన ‘వరుడు’ చిత్రంలోనూ ఆర్య  విల‌న్‌గా న‌టించిన సంగ‌తి తెలిసిందే. వ‌చ్చే ఏడాది ప్ర‌థ‌మార్ధంలో ఈ సినిమా తెర‌పైకి రానుంది.