நீதிமன்ற உத்தரவை அடுத்து தயாரிப்பாளர் சங்க நிர்வாகிகள், விஷாலின் மன்னிப்பை ஏற்று சஸ்பெண்டை ரத்து செய்வதாக நேற்று அறிவித்தனர். சஸ்பெண்ட் ரத்து செய்த சில நிமிடங்களில் தயாரிப்பாளர் சங்க தேர்தலில் தலைவர் பதவிக்கு போட்டியிடவுள்ளதாக விஷால் அறிவித்தார். அதற்கு உலகநாயகன் கமல்ஹாசன் வழிமொழிந்தார் என்பதையும் ஏற்கனவே பார்த்தோம்

இந்நிலையில் தென்னிந்திய தயாரிப்பாளர் சங்கத் தலைவர் பதவிக்கு போட்டி இடுவதற்கான மனுவை சற்று முன் விஷால் தாக்கல் செய்தார் . விஷால் மனுதாக்கல் செய்தபோது, நடிகர்கள் பிரகாஷ் ராஜ், ஆர்யா, இயக்குநர்கள் மிஷ்கின், பாண்டிராஜ், கௌதம் வாசுதேவ் மேனன், பிரவின் காந்தி, இசையமைப்பாளர் எஸ்.எஸ்.குமரன், தயாரிப்பாளர் எஸ்.ஆர்.பிரபு ஆகியோர் உடன் இருந்தனர்.

மனுவை தாக்கல் செய்த பின்னர் வெளியே வந்த விஷால் செய்தியாளர்களிடம் கூறியபோது, 'ஜெயித்து ஒரு ஆண்டுக்குள் வாக்குறுதி நிறைவேற்றாவிட்டால் மொத்தமாக ராஜினாமா செய்வோம்' என்று அதிரடியாக அறிவித்துள்ளார்.

விஷால் ஏற்கெனவே, தென்னிந்திய நடிகர் சங்கத்தின் பொதுச் செயலாளராக பதவி வகித்து வரும் நிலையில் தயாரிப்பாளர் சங்க தலைவர் பதவிக்கும் போட்டியிடுகிறார் என்பது குறிப்பிடத்தக்கது.