இளையதளபதி விஜய்யின் தந்தையும் பிரபல இயக்குனருமான எஸ்.ஏ.சந்திரசேகர் மற்றும் பாடலாசிரியர் விஜய் ஆகியோர் இணைந்து நடிக்கும் திரைப்படம் 'நையப்புடை'. கலைப்புலி எஸ்.தாணு தயாரித்து வரும் இந்த படத்தின் டீசர் இன்று மாலை வெளியாகவுள்ளது. இந்த டீசரை பிரபல நடிகர் ஆர்யா இணையதளத்தில் வெளியிடவுள்ளார்.

எஸ்.ஏ.சந்திரசேகரிடம் உதவி இயக்குனராக இருந்த விஜய்விக்ரம் இயக்கி வரும் இந்த படத்தில் ஓய்வு பெற்ற ராணுவ அதிகாரியாக எஸ்.ஏ.சந்திரசேகர் நடித்துள்ளார். அதே போல் பா.விஜய் இந்த படத்தில் பத்திரிகையாளராக நடித்துள்ளார்.

முன்னாள் ராணுவ அதிகாரியான எஸ்.ஏ.சந்திரசேகரும், பத்திரிகையாளரான பா.விஜய்யும் இணைந்து சமூகத்தில் உள்ள தீயவர்களை அழிக்க செய்யும் போராட்டமே படத்தின் கதை என்று கூறப்படுகிறது. இந்த படத்தின் படப்பிடிப்பு விறுவிறுப்பாக நடைபெற்று வருகிறது. இந்த படத்தை தயாரிக்கும் கலைப்புலி எஸ்.தாணு ரஜினியின் கபாலி' மற்றும் விஜய்யின் 'தெறி' ஆகிய படங்களையும் தயாரித்து வருகின்றார் என்பது குறிப்பிடத்தக்கது.