ஆர்யாவின் ஆணழகன் படத்தின் படப்பிடிப்பு நிறைவு.. விரைவில் சூப்பர் அறிவிப்பு..!
- IndiaGlitz, [Sunday,June 30 2024]
ஆர்யா நடித்து வந்த ’மிஸ்டர் எக்ஸ்’ என்ற படத்தின் படப்பிடிப்பு கடந்த சில மாதங்களாக நடைபெற்று வந்த நிலையில் தற்போது இந்த படத்தின் படப்பிடிப்பு முடிவுக்கு வந்ததை அடுத்து படக்குழுவினர் கேக் வெட்டி கொண்டாடிய புகைப்படங்கள் இணையத்தில் வைரல் ஆகி வருகின்றன.
கடந்த ஆண்டு மார்ச் மாதம் பிரின்ஸ் பிக்சர்ஸ் நிறுவனத்தின் தயாரிப்பில் உருவாகும் ‘மிஸ்டர் எக்ஸ்’ என்ற படத்தின் அறிவிப்பு வெளியானது. இதையடுத்து கடந்த ஆண்டு ஏப்ரல் மாதம் படப்பிடிப்பு தொடங்கிய நிலையில் தற்போது இந்த படத்தின் படப்பிடிப்பு முடிவுக்கு வந்துள்ளது.
இந்த படத்தில் ஆணழகன் கேரக்டரில் ஆர்யா நடித்து வரும் நிலையில் அவர் வொர்க்-அவுட் செய்து நிஜ ஆணழகன் போலவே மாறினார். அவரது டெடிகேஷனை பார்த்து படக்குழுவினர்களே ஆச்சரியம் அடைந்தனர். ’சார்பாட்டா பரம்பரை’ படம் போலவே இந்த படமும் ஆர்யாவின் திரையுலக வாழ்வில் ஒரு திருப்புமுனையை ஏற்படுத்தும் என்று எதிர்பார்க்கப்படுகிறது.
ஆர்யா, கவுதம் கார்த்திக், சரத்குமார், மஞ்சு வாரியர், அனைகா, ரைசா வில்சன், அதுல்யா ரவி உட்பட பலர் நடிக்கும் இந்த படத்தை மனு ஆனந்த இயக்கியுள்ளார். இவர் ஏற்கனவே விஷ்ணு விஷால் நடித்த ‘எப்.ஐ.ஆர்’ படத்தை இயக்கியுள்ளார் என்பது குறிப்பிடத்தக்கது.
’மிஸ்டர் எக்ஸ்’ படத்தின் படப்பிடிப்பு முடிவடைந்ததை அடுத்து இன்னும் சில நாட்களில் தொழில்நுட்ப பணிகள் தொடங்கும் என்றும் விரைவில் இந்த படத்தின் டீசர், டிரைலர் மற்றும் ரிலீஸ் தேதி குறித்து அறிவிப்பு வெளியாகும் என்றும் எதிர்பார்க்கப்படுகிறது.