தமிழ், தெலுங்கு என இரண்டு மொழிகளிலும் முன்னணி இடத்தில் இருக்கும் அனுஷ்காவின் 'பாகுபலி' சமீபத்தில் ரிலீஸாகி மாபெரும் வெற்றி அடைந்ததை அடுத்து வரும் செப்டம்பர் 17ஆம் தேதி அவர் நடித்த அடுத்த சரித்திர படம் 'ருத்ரம்மாதேவி' வெளியாக இருந்தது. ஆனால் ஒருசில காரணங்களினால் அந்த படத்தின் ரிலீஸ் தேதி தள்ளி வைக்கப்பட்ட நிலையில், அனுஷ்கா நடித்த இன்னொரு படத்தின் ரிலீஸ் தேதியும் தள்ளி வைக்கப்பட்டுள்ளதாக கூறப்படுகிறது.

ஆர்யா, அனுஷ்கா நடிப்பில் பிரகாஷ் இயக்கியுள்ள 'இஞ்சி இடுப்பழகி' படத்தின் படப்பிடிப்பு முற்றிலும் முடிந்து ரிலீசுக்கு தயாராக உள்ளது. இந்த படம் வரும் அக்டோபர் 2ஆம் தேதி ரிலீஸ் செய்யப்படும் என அறிவிக்கப்பட்டிருந்த நிலையில், தற்போது மேலும் இரண்டு வாரங்களுக்கு ஒத்தி வைக்கப்பட்டுள்ளதாக கூறப்படுகிறது.

அக்டோபர் 1ஆம் தேதி இளையதளபதி விஜய் நடித்த 'புலி' படம் தமிழ், தெலுங்கு என இரண்டு மொழிகளிலும் பிரமாண்டமாக ரிலீஸ் ஆவதால் அந்த படத்துடன் மோதுவதை தவிர்ப்பதற்காகவே ரிலீஸ் தேதி தள்ளி வைக்கப்பட்டுள்ளதாக கூறப்படுகிறது.

தமிழில் 'இஞ்சி இடுப்பழகி' என்ற பெயரிலும் தெலுங்கில் 'சைஸ் ஜீரோ' என்ற பெயரிலும் ரிலீஸாகவுள்ள இந்த படத்தை பிவிபி நிறுவனம் தயாரித்துள்ளது. இந்நிலையில் இந்த படத்தின் டீசரை சற்று முன்னர் வெளியிட்டுள்ள பிவிபி நிறுவனம் ஆடியோ ரிலீஸ் வரும் செப்டம்பர் 6ஆம் தேதி என தனது சமூக வலைத்தள பக்கத்தில் சற்று முன்னர் அறிவித்துள்ளது.