ஆர்யாவின் ஆறு மாத முயற்சிக்கு கிடைத்த பலன்
- IndiaGlitz, [Tuesday,April 26 2016]
'பெங்களூர் நாட்கள்' படத்தை அடுத்து ஆர்யா தற்போது 'மஞ்சப்பை' இயக்குனர் ராகவ் இயக்கத்தில் ஒரு படத்தில் நடித்து வருகிறார் என்பதை ஏற்கனவே பார்த்தோம். இந்த படத்தில் ஆர்யா பழங்குடியினர் வேடத்தில் நடிப்பதால், கேரக்டருக்கு தகுந்தவாறு தன்னுடைய உடல் எடையை அதிகரித்துள்ளார்.
சுமார் ஆறு மாத காலம் ஜிம்மில் உடற்பயிசி செய்து தற்போது 88 கிலோ ஆர்யாவாக மாறியுள்ளார். ஆர்யா நடித்த 'இஞ்சி இடுப்பழகி' படத்திற்காக அனுஷ்கா உடல் எடையை கூட்டியதுபோல், இந்த படத்திற்காக ஆர்யா தனது உடல் எடையை அதிகரித்துள்ளார் என்பது குறிப்பிடத்தக்கது.
சூப்பர் குட் பிலிம்ஸ் நிறுவனம் தயாரித்து வரும் இந்த படத்தின் படப்பிடிப்பு விறுவிறுப்பாக நடைபெற்று வருவதாகவும் இந்த படத்தின் படப்பிடிப்பு முடிந்த பின்னர் சைக்கிளிங் மற்றும் ஒருசில உடற்பயிற்சிகள் மூலம் மீண்டும் பழைய நிலைமைக்கு திரும்பிவிட முடிவு செய்திருப்பதாகவும் ஆர்யா கூறியுள்ளார்.
இந்த படத்தில் ஆர்யாவுக்கு ஜோடியாக 'மெட்ராஸ்' நடிகை கேதரின் தெரசா நடித்து வருகிறார். யுவன்ஷங்கர் ராஜா இந்த படத்திற்கு இசையமைக்கின்றார் என்பது குறிப்பிடத்தக்கது.