பழம்பெரும் நடிகர் விஜயகுமாரின் மகனும் நடிகருமான அருண்விஜய், கோலிவுட் திரையுலகில் ஒரே ஒரு வெற்றிக்காக பல ஆண்டுகளாக காத்திருந்த நிலையில் அவருக்கு திருப்புமுனையாக அமைந்த படம் அஜித்தின் 'என்னை அறிந்தால். இந்த படத்தில் அஜித்தே இயக்குனரிடம் முன்வந்து அருண்விஜய்க்கு சிறப்பான காட்சிகள் அமைய உதவி செய்தார் என்று கூறப்பட்டது. இந்த படம் ரிலீஸ் ஆனவுடன் அஜித் ரசிகர்களின் அன்பால் அருண்விஜய் நெகிழ்ந்து போனார்.

இந்த நிலையில் 'பாகுபலி' நாயகன் பிரபாஸ் நடித்து வரும் 'சாஹோ' என்ற பிரமாண்டமான படத்தில் ஒரு முக்கிய வேடத்தில் அருண்விஜய் நடிக்கவுள்ளதாகவும், இந்த படம் அவருக்கு 'என்னை அறிந்தால்' போலவே நல்ல பெயர் வாங்கித்தரும் என்றும் எதிர்பார்க்கப்படுகிறது. மேலும் இந்த படம் தமிழ், மலையாளம், தெலுங்கு மற்றும் இந்தி என 4 மொழிகளில் வெளியாகவுள்ளதால் அருண்விஜய் இந்திய அளவில் பிரபலமடைய வாய்ப்பு உள்ளது. அதேபோல் அஜித் ரசிகர்கள் கொடுத்த நெகிழ்ச்சியான அனுபவத்தை பிரபாஸ் ரசிகர்களிடம் இருந்தும் அருண்விஜய் பெறுவாரா? என்பதை பொறுத்திருந்து பார்ப்போம்.

'சாஹோ' தவிர அருண்விஜய் நடிக்கும் இன்னொரு படத்தை 'தடையற தாக்க' படத்தின் இயக்குனர் மகிழ்திருமேனி இயக்கவுள்ளதாகவும் கூறப்படுகிறது.