மீண்டும் தள்ளிவைக்கப்பட்ட 'பார்டர்' ரிலீஸ்.. ரசிகர்கள் ஏமாற்றம்..!
- IndiaGlitz, [Tuesday,February 21 2023]
அருண்விஜய் நடிப்பில் அறிவழகன் இயக்கத்தில் உருவான ‘பார்டர்’ என்ற திரைப்படம் பிப்ரவரி 24ஆம் தேதி வெளியாகும் என அறிவிக்கப்பட்டிருந்த நிலையில் தற்போது மீண்டும் தள்ளி வைக்கப்பட்டுள்ளதாக தகவல் வெளியாகியுள்ளன.
அருண் விஜய் நடித்த ‘பார்டர்’ திரைப்படம் கடந்த ஆண்டு ரிலீசுக்கு தயாரான நிலையில் ஏற்கனவே ஒரு சில முறை ரிலீஸ் செய்து அறிவிக்கப்பட்டு பின்னர் ஒத்திவைக்கப்பட்டது.
இந்த நிலையில் சமீபத்தில் இந்த படம் பிப்ரவரி 24ஆம் தேதி ரிலீஸ் ஆகும் என அதிகாரப்பூர்வமாக அறிவிக்கப்பட்டு புரமோஷன் பணிகளும் நடைபெற்று வந்தது. இந்த நிலையில் சற்று முன் வெளியான தகவலின்படி ‘பார்டர்’ திரைப்படம் மீண்டும் ஒத்திவைக்கப்பட்டுள்ளதாகவும் புதிய ரிலீஸ் தேதி விரைவில் அறிவிக்கப்படும் என்றும் படக்குழுவினர் தெரிவித்துள்ளனர். இதனால் அருண்விஜய் ரசிகர்கள் ஏமாற்றம் அடைந்துள்ளனர்.
பாதுகாப்பு புலனாய்வு அதிகாரி அர்விந்த் சந்திரசேகர் என்ற கேரக்டரில் அருண் விஜய் நடித்த இந்த படத்தில் ரெஜினா நாயகியாக நடித்துள்ளார். சாம் சிஎஸ் இசையமைப்பில், ராஜசேகர் ஒளிப்பதிவில், பாபு ஜோசப் படத்தொகுப்பில் இந்த படம் உருவாகியுள்ளது.
இந்த நிலையில் அருண் விஜய் தற்போது ஏஎல் விஜய் இயக்கத்தில் உருவாகி வரும் ’அச்சம் என்பது இல்லையே’ என்ற படத்தில் நடித்து வருகிறார். எமி ஜாக்சன் நாயகியாக நடித்து வரும் இந்த படத்தின் படப்பிடிப்பு விறுவிறுப்பாக நடைபெற்று வருகிறது.