பிரபல பாடலாசிரியர், பாடகர் அருண்காமராஜ் என்றவுடன் அவர் 'கபாலி' படத்திற்கு பாடிய 'நெருப்புடா' பாடலும், 'பைரவா' படத்திற்கு பாடிய 'வர்லாம் வர்லாம் வா' பாடலும் தான் அனனவருக்கும் ஞாபகம் வரும்.

பாடலாசிரியர், பாடகர் என புகழ்பெற்று வரும் அருண்காமராஜ் விரைவில் அடுத்த அவதாரத்தை தொடங்கவுள்ளார். ஆம், அருண்காமராஜ் விரைவில் ஒரு திரைப்படத்தை இயக்கவுள்ளார்

அருண்காமராஜின் முதல் படம் மகளிர் கிரிக்கெட்டை பற்றி பேசப்போகிறதாம். சமீபத்தில் மகளிர் உலகக்கோப்பை போட்டியில் இறுதிப்போட்டி வரை சென்ற இந்திய மகளிர் கிரிக்கெட் அணியை கெளரவப்படுத்தும் வகையில் இந்த படம் இருக்கும் என்று எதிர்பார்க்கப்படுகிறது. ஆண்கள் மட்டுமே ஆதிக்கம் செலுத்தும் கிரிக்கெட் விளையாட்டில் ஒரு பெண் கிரிக்கெட் போட்டியில் எப்படி போராடி வெற்றி பெறுகிறார் என்று இந்த படம் இருக்கும் என்றும், அதுமட்டுமின்றி அப்பா-மகள் உறவின் மேன்மை குறித்தும் இந்த படம் பேசும் என்றும் அருண்காமராஜ் கூறியுள்ளார்.

இந்த படத்தின் திரைக்கதையை மகளிர் உலகக்கோப்பை போட்டிக்கு முன்னரே தான் எழுதிவிட்டதாகவும், இருப்பினும் இந்த படத்தை இயக்க இது சரியான நேரம் என்று தான் கருதுவதாகவும் அருண்காமராஜ் கூறினார். அருண்காமராஜின் முதல் படம் இன்னொரு 'டங்கல்' ஆக இருக்க வாழ்த்துவோம்.