சிவகார்த்திகேயன் நடித்து வரும் 'சீமராஜா' படத்தின் படப்பிடிப்பு ஏற்கனவே முடியுந்தருவாயில் உள்ளதால் ஸ்டிரைக் முடிந்தவுடன் ஒருசில நாட்களில் இந்த படத்தின் படப்பிடிப்பு முடிந்துவிடும் என்று எதிர்பார்க்கப்படுகிறது.

இந்த நிலையில் சிவகார்த்திகேயன் தயாரிப்பில் அவரது நண்பரும் பாடகர்-பாடலாசிரியருமான அருண்காமராஜ் இயக்கி வரும் படத்தின் முதல்கட்ட படப்பிடிப்பு தற்போது முடிவுக்கு வந்துள்ளது. மேலும் ஸ்டிரைக் முடிந்தவுடன் இரண்டாம் கட்ட படப்பிடிப்பு தொடங்கும் என தெரிகிறது

இதுகுறித்து அருண்காமராஜ் தனது சமூக வலைத்தளத்தில் கூறியபோது, 'முதல் கட்ட படப்பிடிப்பினை வெற்றிகரமாக முடிக்க அர்ப்பணிப்புடன் உழைத்த அத்துனை நல்ல உள்ளங்களுக்கும் என் நெஞ்சார்ந்த நன்றி' என்று தெரிவித்துள்ளார்.

சத்யராஜ், ஐஸ்வர்யா ராஜேஷ் அப்பா-மகளாக நடித்து வரும் இந்த படத்தில் நடிகர் தர்ஷன் முக்கிய வேடத்தில் நடித்து வருகிறார். தினேஷ் கிருஷ்ணன் ஒளிப்பதிவில், திபு நினன் தாமஸ் இசையில், இளையராஜா கலையில் உருவாகும் இந்த படத்தை ஆண்டனி எல் ரூபன் படத்தொகுப்பு செய்கிறார். பல்லவி சிங் ஆடை வடிவமைப்பாளராகவும், வின்சி ராஜ் டிசைனராகவும் பணி புரிகிறார்கள்.