கடந்த சில வருடங்களாக உதயநிதி ஸ்டாலின், அருள்நிதி நடித்த படங்களுக்கு தமிழக அரசின் வரிவிலக்கு கிடைப்பது என்பது எட்டாக்கனியாக இருந்தது. ஆனால் தற்போது அதே கட்சி ஆட்சி புரிந்தாலும் இந்த விஷயத்தில் பெரும் மாற்றம் ஏற்பட்டுள்ளது.

சமீபத்தில் உதயநிதி நடித்த 'சரவணன் இருக்க பயமேன்' படத்திற்கு ரிலீசுக்கு முன்பே எந்தவித பிரச்சனையும் இன்றி தமிழக அரசின் வரிவிலக்கு சலுகை கிடைத்தது. இதை கோலிவுட்டே ஆச்சரியத்தில் பார்த்தபோது தற்போது அருள்நிதி நடித்த 'பிருந்தாவனம்' படத்திற்கும் தமிழக அரசின் 30% வரிவிலக்கு கிடைத்துள்ளதை இரண்டாவது அதிசயமாக கோலிவுட்டினர் கருதுகின்றனர். ஆனாலும் வரும் ஜூலை முதல் ஜிஎஸ்டி வரிவிதிப்பு அமல்படுத்தப்படவுள்ளதால் இந்த அதிசயங்கள் தொடர வாய்ப்பில்லை என்பது குறிப்பிடத்தக்கது.

இயக்குனர் ராதாமோகன் இயக்கத்தில் அருள்நிதி, தான்யா,விவேக் நடித்துள்ள 'பிருந்தாவனம்' படத்திற்கு வரிவிலக்கு கிடைத்துள்ளதால் தயாரிப்பு தரப்பும் விநியோகிஸ்தர்கள் தரப்பும் உற்சாகத்தில் உள்ளது. வரும் வெள்ளியன்று வெளியாகவுள்ள இந்த படம், ராதாமோகனின் மற்றொரு தரம் வாய்ந்த படமாக இருக்கும் என்று எதிர்பார்க்கப்படுகிறது.