தமிழ் திரையுலகின் இளையதலைமுறை நடிகர்களில் ஒருவரான அருள்நிதி நடித்த ‘தேஜாவு’ என்ற படத்தின் டீஸர் சற்று முன்பு வெளியாகி இணையதளங்களில் வைரலாக வருகிறது.

இந்த டீசரின் ஆரம்பத்தில் ’கேம் ஆரம்பித்த முதல் மூவில் உங்களுக்கு ஒருத்தன் செக் வைத்தால் எப்படி இருக்கும்? அப்படி இருந்தது அந்த கேஸ் எனக்கு. ஒவ்வொரு முறையும் எனக்கு செக் வைத்துக் கொண்டு வந்தான். ஒரு ஆட்டத்தில் சுலபமாக ஜெயித்துவிட்டால் அதுல என்ன சுவாரசியம் இருக்கும்? ஒரு கிரிமினல் அவனே இப்படி ஆடுறான்னா, ஐபிஎஸ் நான் எப்படி ஆடுவேன்’ என்ற வசனத்துடன் இந்த டீஸர் தொடங்குகிறது.

ஒரு முக்கிய கொலை வழக்கை அருள்நிதி கண்டுபிடிக்கும் கதையம்சம் கொண்ட இந்த படம் த்ரில் மற்றும் சஸ்பென்ஸ் உடன் இருக்கும் என்று எதிர்பார்க்கப்படுகிறது. அருள்நிதி, மதுபாலா, காளி வெங்கட் உள்பட பலர் நடித்த இந்தப்படத்தை அரவிந்த் ஸ்ரீனிவாசன் என்பவர் இயக்கியுள்ளார். ஜிப்ரான் இசையில் பிஜி முத்தையா ஒளிப்பதிவில் உருவாகியுள்ள இந்த படத்தை விஜய் பாண்டி என்பவர் தயாரித்துள்ளார்.