ஹாலிவுட் சூப்பர் ஸ்டாருடன் மோதுவாரா ரஜினி?
- IndiaGlitz, [Sunday,August 30 2015]
சூப்பர் ஸ்டார் ரஜினிகாந்த் நடிக்கவுள்ள 'கபாலி' திரைப்படம் வரும் செப்டம்பர் முதல் தொடங்கவுள்ள நிலையில் இந்த படத்தை அடுத்து அவர் 'எந்திரன் 2' படத்தில் நடிக்கவுள்ளார். பிரமாண்ட இயக்குனர் ஷங்கர் இயக்கவுள்ள இந்த படத்தை லைகா புரொடக்ஷன் நிறுவனம் ரூ.300 கோடி பட்ஜெட்டில் தயாரிக்கவுள்ளதாக கூறப்படுகிறது.
இந்த படத்தில் ரஜினிக்கு ஜோடியாக தீபிகா படுகோனே அல்லது காத்ரீனா கைப் நடிப்பார் என எதிர்பார்க்கப்படும் நிலையில் இந்த படத்தின் வில்லனை தேர்வு செய்வதில் ஷங்கர் மும்முரமாக இருப்பதாக கூறப்படுகிறது. ரஜினிக்கு வில்லனாக கமல்ஹாசன், அமீர்கான், விக்ரம் ஆகியோர்களை பரிசீலனை செய்யப்பட்ட நிலையில் தற்போது ஹாலிவுட் சூப்பர் ஸ்டார் அர்னால்ட் இந்த படத்தின் வில்லனாக நடிக்க வாய்ப்பு இருப்பதாக கூறப்படுகிறது. இதுகுறித்து முதல்கட்ட பேச்சுவார்த்தை நடைபெற்று வருவதாகவும், விரைவில் இதுகுறித்த அறிவிப்பு வெளிவரும் என்றும் கூறப்படுகிறது.
ஏற்கனவே 'ஐ' படத்தின் இசை வெளியீட்டின்போது பேசிய அர்னால்ட், 'ஷங்கர் படத்தில் நடிக்க ஆர்வமுள்ளதாக கூறியது அனைவருக்கும் நினைவிருக்கலாம். நம்மூர் சூப்பர் ஸ்டாரும் ஹாலிவுட் சூப்பர் ஸ்டாரும் ஹீரோ-வில்லனாக மோதும் காட்சியை ஷங்கர் இயக்கத்தில் பார்த்தால் உண்மையில் பிரமாண்டத்தின் உச்சகட்டமாகத்தான் இருக்கும் என எதிர்பார்க்கலாம்.