వెండితెర నుండి డిజిట‌ల్ రంగం వైపుకు ప్రేక్ష‌కులు ఎక్కువ‌గా ఆక‌ర్షితుల‌వుతున్నారు. దీన్ని దృష్టిలో పెట్టుకుని అల్లు అర‌వింద్ తెలుగు ఓటీటీ యాప్ ఆహాను స్టార్ట్ చేసిన సంగ‌తి తెలిసిందే. ఆహాను తెలుగు వారికి మ‌రింత చేరువ చేయ‌డానికి అల్లు అర‌వింద్ చేయ‌ని ప్ర‌య‌త్నం అంటూ లేదు. టాలీవుడ్‌లోకి కొంత మంది పేరెన్న‌త‌గ్గ ద‌ర్శ‌కుల‌ను, కంటెంట్ రైటర్స్‌ను నియ‌మించుకుని కంటెంట్‌ను డెవ‌ల‌ప్ చేయించుకుంటున్నారు. మ‌రో వైపు కొత్త సినిమాల‌కు సంబంధించి ఓటీటీ హక్కుల‌ను కూడా ద‌క్కించ‌కుంటున్నారు. అందులో భాగంగా రీసెంట్‌గా ‘భానుమ‌తి అండ్‌ రామ‌కృష్ణ‌, కృష్ణ అండ్ హిస్ లీల’ చిత్రాల‌ను ఆహాలో విడుద‌ల చేశారు.

ఇప్పుడు మ‌రో సినిమా కోసం నిర్మాత‌తో చ‌ర్చ‌లు జ‌రుపుతున్నార‌ని టాక్ విన‌ప‌డుతోంది. ఆ నిర్మాత ఎవ‌రో కాదు.. దిల్‌రాజు. ఇద్ద‌రి మ‌ధ్య మంచి అనుబంధం ఉంది. ఆ కార‌ణంగా అల్లు అర‌వింద్.. నాని హీరోగా దిల్‌రాజు నిర్మించిన ‘వి’ సినిమా కోసం గ‌ట్టి ప్ర‌య‌త్నాలు చేస్తున్నారు. క‌రోనా కార‌ణంగా ఇప్ప‌ట్లో థియేట‌ర్స్ ఓపెన్ అయ్యేలా క‌న‌ప‌డ‌టం లేదు. దీంతో ఈ చిత్రాన్ని ఆహా ఓటీటీలో విడుదల చేయడానికి ట్రై చేస్తున్నారు. ‘వి’ సినిమా కోసం ఇది వరకు చాలా డిజిటల్ సంస్థలు ట్రై చేసినా ఒప్పుకోని దిల్‌రాజు మ‌రి అర‌వింద్ మాట వింటారా? అనేది చూడాలి.