சூப்பர் ஸ்டார் ரஜினிகாந்த் உடல் நலக்குறைவு காரணமாக சென்னை அப்பல்லோ மருத்துவமனையில் அனுமதிக்கப்பட்ட நிலையில், அவரது உடல்நிலை குறித்து மருத்துவமனை நிர்வாகம் சற்றுமுன் அதிகாரப்பூர்வமாக அறிவிப்பு வெளியிட்டுள்ளது.

அந்த அறிவிப்பில் கூறியிருப்பதாவது: நடிகர் ரஜினிகாந்த் செப்டம்பர் 30-ஆம் தேதி கிரீம்ஸ் சாலையில் உள்ள அப்பல்லோ மருத்துவமனையில் அனுமதிக்கப்பட்டார். அவரது இதயத்துக்குச் செல்லும் பிரதான ரத்த நாளத்தில் வீக்கம் காணப்பட்டதைத் தொடர்ந்து, அறுவை சிகிச்சை இல்லாமல் சிகிச்சை அளிக்கப்பட்டுள்ளது.

மூத்த இருதய அறுவை சிகிச்சை நிபுணர் டாக்டர் சாய் சதீஷ், வீக்கத்தை முற்றிலுமாக நீக்கும் வகையில் ஸ்டண்ட் வைத்து சிகிச்சை அளித்தார். இந்த சிகிச்சை வெற்றிகரமாக முடிந்தது, எனவே ரஜினி ரசிகர்களுக்கும் நல விரும்பிகளுக்கும் அவரது சிகிச்சை வெற்றிகரமாக முடிந்தது என்பதை தெரிவித்து கொள்கிறோம்.

தற்போது ரஜினிகாந்தின் உடல்நிலை சீராக உள்ளது, மேலும் அவர் குணமடைந்து வருகிறார். இன்னும் இரண்டு நாட்களில் அவர் டிஸ்சார்ஜ் செய்யப்படுவார்’ என்று அறிவிக்கப்பட்டுள்ளது. இந்த அறிவிப்பு, ரஜினி ரசிகர்களுக்கு நிம்மதி அளித்துள்ளது என்பது குறிப்பிடத்தக்கது.