నేషనల్ స్పోర్ట్స్ డే సందర్భంగా ఏపీ ప్రభుత్వం ఏర్పాటు చేసిన ఓ ఫ్లెక్సీ ఇప్పుడు పెద్ద ఎత్తున ట్రోలింగ్ జరుగుతోంది. ఫ్లెక్సీలో సానియా మీర్జా ఫోటో ప్రింట్ చేసి.. కింద పీటీ ఉష పేరు రాయడం జరిగింది. అలాగే ప్రోత్సహకాలను ఇంగ్లీష్‌లో టైటిల్ పెట్టడంపై ట్రోల్ చేస్తున్నారు. సానియా మీర్జాకు, పీటీ ఉషకు తేడా తెలియదా..? అంటూ నెటిజన్లు, ప్రతిపక్షానికి చెందిన నేతలు తీవ్రస్థాయిలో మండిపడుతున్నారు. ప్రస్తుతం ఈ వ్యవహారం సోషల్ మీడియాలో పెద్ద ఎత్తునే చర్చ జరుగుతోంది. ఈ ఫ్లెక్సీ జాతీయ క్రీడా ఏర్పాట్లలో విశాఖ అధికారులు ఏర్పాటు చేయడం జరిగింది. బీచ్ రోడ్డులో ప్రభుత్వం అధికారికంగా ఏర్పాటు చేసిన బ్యానర్లలో తప్పిదాలు అధికారులను నవ్వుల పాలు చేశాయి. ర్యాలీలో పాల్గొనేందుకు వచ్చిన క్రీడాకారులు ఫ్లెక్సీలను చూసి కంగుతిన్నారు.

ఆ మాత్రం తెలియకుంటే ఎలా..!?
అయితే ఇది మంత్రి గారు చూసి కూడా మిన్నకుండిపోవడం గమనార్హం. అంటే ఆయనకు కూడా సానియా ఎవరో... ఉష ఎవరో తెలియదా..? లేకపోతే తెలిసి కూడా లైట్ తీసుకున్నారా అన్నది పైనున్న పెరుమాళ్లకే ఎరుక. పేరుకేమో ఆటల మంత్రి.. ఆ మాత్రం తెలియదా అంటూ ఇటు ప్రతిపక్షాలు.. అటు నెటిజన్లు ఓ రేంజ్‌లో ఈ ఫ్లెక్సీని, మంత్రిని ట్రోల్ చేస్తున్నారు.

సింధులాంటి ఆణి ముత్యాలకు..!
దీన్ని భూతద్ధం పట్టి చూసిన మాజీ మంత్రి నారా లోకేష్.. ట్విట్టర్ వేదికగా వైసీపీ సర్కార్‌ను టార్గెట్ చేశారు. ‘చంద్రబాబుగారు ఉమ్మడి రాష్ట్రానికి ముఖ్యమంత్రిగా ఉన్న కాలంలో క్రీడాకారులు గోపీచంద్ కు ఐదెకరాల స్థలం ఇచ్చి బ్యాడ్మింటన్ అకాడమీ ఏర్పాటుకు సహకరించారు. ఇప్పుడా అకాడమీ పీవీ సింధులాంటి క్రీడా ఆణిముత్యాలను దేశానికి అందిస్తోంది. అది చంద్రబాబుగారి దార్శనికత’అంటూ క్రీడాకారులకు టీడీపీ హయాంలో ప్రోత్సహం అందించామన్నారు.

సానియా ఎవరో ఉష ఎవరో తెలియదా..!?
‘ఇక ఇప్పటి వైసీపీ ప్రభుత్వం క్రీడలకు ప్రోత్సాహం ఇచ్చే సంగతి అటుంచి, స్వాతిముత్యాల్లాంటి తమ పార్టీ నేతల క్రీడా పరిజ్ఞానంతో క్రీడాకారులను అవమానించకపోతే చాలు అన్నట్టు వ్యవహరిస్తోంది. సానియా మీర్జా ఎవరో, పి.టి. ఉష ఎవరో తెలీని దురవస్థలో క్రీడాశాఖ మంత్రి ఉన్నారు’అంటూ మరో ట్వీట్‌లో లోకేష్ విమర్శలు గుప్పించారు.

అయితే.. ఇలాంటి ఫ్లెక్సీ వ్యవహారాలు వైసీపీకి పరిపాటిగా వస్తున్నాయి. మొన్నటికి మొన్న నెల్లూరులో ఇస్రో ఓ భారీ ప్రయోగాన్ని చేసి సక్సెస్ అయితే దానికి ‘నాసా’ సక్సెస్ అయ్యిందని చంద్రగిరి ఎమ్మెల్యే, తుడా చైర్మన్‌ చెవిరెడ్డి పేరిట ఫ్లెక్సీలు వెలిశాయి. తాజాగా ఇలా ఏకంగా ఆటల మంత్రి పేరిటే ఫ్లెక్సీలు వెలిశాయంటే పరిస్థితి ఏంటో అర్థం చేసుకోవచ్చు.