పేద విద్యార్ధులు ప్రపంచంలోని అత్యుత్తమ యూనివర్సిటీల్లో ఉన్నత విద్యను అభ్యసించేందుకు గాను ఆంధ్రప్రదేశ్‌లోని వైఎస్ జగన్ ప్రభుత్వం ‘జగనన్న విదేశీ విద్యా దీవెన’’ పథకాన్ని అమలు చేస్తున్న సంగతి తెలిసిందే. ఈ పథకం కింద ఎస్సీ, ఎస్టీ, బీసీ, మైనారిటీ విద్యార్ధులకు రూ.1.25 కోట్ల వరకు .. ఇతరులకు రూ.కోటి వరకు 100 శాతం ఫీజు రీయింబర్స్‌మెంట్ అందుతుంది. దీనిలో భాగంగా ఈ రోజు లబ్ధిదారుల ఖాతాల్లో నిధులు జమ చేయనున్నారు జగన్. ఈ విడతలో అర్హులైన 357 మంది విద్యార్ధులు రూ.45.53 కోట్లు అందుకోనున్నారు.

టీడీపీ హయాంలో అరకొరగా సాయం:

గతంలో తెలుగుదేశం ప్రభుత్వం హయాంలో విదేశాలకు వెళ్లే విద్యార్ధులకు ఎస్సీ, ఎస్టీలకు కేవలం రూ.15 లక్షలు, ఇతరులకు రూ.10 లక్షలు మాత్రమే ఇచ్చేవారు. అంతేకాదు.. ఈ ఫీజును కూడా చాలా మందికి చంద్రబాబు సర్కార్ చెల్లించలేదు. 2016-17 విద్యా సంవత్సరం నుంచి 3,326 మంది విద్యార్ధులకు రూ.318 కోట్లు బకాయిలు పెట్టి.. తర్వాత పథకాన్ని ఎత్తివేసింది. జగన్ పగ్గాలు అందుకున్న తర్వాత విదేశాల్లో చదువుకుంటున్న విద్యార్ధులందరికీ ఫీజులు చెల్లించేలా ‘‘జగనన్న విదేశీ విద్యా ’’ పథకాన్ని రూపొందించారు.

రాష్ట్ర స్థాయి ఎంపిక కమిటీ ద్వారా లబ్ధిదారుల ఎంపిక :

ప్రతి ఏడాది 2 సీజన్లలో విదేశీ విశ్వవిద్యాలయాల్లో అడ్మిషన్లు పొందిన వారికి ఆర్ధిక సాయం చేస్తున్నారు. ఉన్నతాధికారుల నేతృత్వంలోని రాష్ట్ర స్థాయి ఎంపిక కమిటీ ద్వారా లబ్ధిదారులను ఎంపిక చేస్తున్నారు. క్యూఎస్ వరల్డ్ యూనివర్సిటీ ర్యాంకింగ్, టైమ్స్ హయ్యర్ ఎడ్యుకేషణ్ ర్యాంకింగ్స్ ప్రకారం టాప్ 50 యూనివర్సిటీలకు ఎంపికైన విద్యార్ధులకు ఈ పథకాన్ని వర్తింపజేస్తున్నారు. 4 వాయిదాల్లో స్కాలర్‌షిప్స్ మంజూరు చేస్తున్నారు. గడిచిన 6 నెలల్లో ‘జగనన్న విదేశీ విద్యా దీవెన’’ కింద రూ.65.48 కోట్ల ఆర్ధిక సాయం అందించారు.