జగన్ కీలక నిర్ణయం.. సంగం బ్యారేజీకి గౌతమ్ రెడ్డి పేరు, అసెంబ్లీలో ప్రకటన
- IndiaGlitz, [Tuesday,March 08 2022]
ఇటీవల గుండెపోటుతో మరణించిన గౌతమ్‌రెడ్డి మరణంపై ఏసీ సీఎం వైఎస్ జగన్ మరోసారి ఆవేదన వ్యక్తం చేశారు. ఆంధ్రప్రదేశ్ అసెంబ్లీ బడ్జెట్ సమావేశాల్లో భాగంగా రెండోరోజు గౌతమ్ రెడ్డి మృతిపై ప్రభుత్వం తరఫున ముఖ్యమంత్రి సంతాప తీర్మానం ప్రవేశపెట్టారు. సభ్యులు ప్రసంగించిన అనంతరం సీఎం జగన్ మాట్లాడుతూ.. గౌతమ్‌రెడ్డి తనకు చిన్నప్పట్నుంచి మంచి స్నేహితుడని గుర్తు చేసుకున్నారు. ఆయన లేని లోటు పూడ్చలేనిదని.. గౌతమ్‌రెడ్డి మృతి తనకు, పార్టీకి, రాష్ట్రానికి తీరని లోటని ఆవేదన వ్యక్తం చేశారు.
మంచి స్నేహితుడ్ని కోల్పోవడం బాధాకరమని.. గౌతమ్‌రెడ్డి అకాల మరణాన్ని జీర్ణించుకోలేకపోతున్నామని జగన్ అన్నారు. చాలా సందర్భాల్లో గౌతమ్‌రెడ్డి తనకు అండగా నిలబడ్డారని .. అప్పగించిన బాధ్యతలను సమర్ధవంతంగా నిర్వర్తించారని ముఖ్యమంత్రి ప్రశంసించారు. రాష్ట్రంలోకి కొత్త కంపెనీలు రావడంలో గౌతమ్‌రెడ్డి కీలక పాత్ర పోషించారని జగన్ గుర్తుచేశారు.
పరిశ్రమల శాఖ మంత్రిగా గౌతమ్‌రెడ్డి చాలా కృషి చేశారని తెలిపారు. గౌతమ్‌రెడ్డి లేకపోయినా ఆయన కన్న కలలు నెరవేరుస్తామని సీఎం జగన్ స్పష్టం చేశారు. వెలిగొండ ప్రాజెక్ట్‌ ద్వారా ఉదయగిరికి తాగునీటిని అందిస్తామని చెప్పారు. సంగం బ్యారేజీ పనులను 6 వారాల్లో పూర్తి చేస్తామని ముఖ్యమంత్రి తెలిపారు. సంగం బ్యారేజీకి మేకపాటి గౌతమ్‌రెడ్డి పేరు పెడతామని అసెంబ్లీ సాక్షిగా సీఎం జగన్ ప్రకటించారు.