‘అఆ’ సినిమాతో తెలుగు తెరకు పరిచయమైన క‌థానాయిక‌ కేరళ కుట్టి అనుపమ పరమేశ్వరన్. ఈ సినిమాలో.. అమాయకంగా కనిపిస్తూనే తను అనుకున్నది చేసే నాగవల్లి పాత్రలో చక్కగా నటించింది. అంతేగాకుండా.. తొలి తెలుగు చిత్రంతోనే న‌టిగా మంచి గుర్తింపు తెచ్చుకుంది ఈ మలబారు సుందరి. ఆ తర్వాత ‘ప్రేమమ్’, శతమానంభవతి’ చిత్రాల్లో నటించి.. హ్యాట్రిక్ విజయాలతో తెలుగు ప్రేక్షకులకి మరింత దగ్గరయింది.

ఇదిలా ఉంటే.. గత ఏడాది రామ్ హీరోగా న‌టించిన‌ ‘ఉన్నది ఒకటే జిందగీ’ సినిమాలో ఓ క‌థానాయిక‌గా న‌టించింది అనుప‌మ‌. స్నేహానికి అర్ధం చెప్పే ఈ చిత్రంలో మహాగా నటించి విమర్శకుల ప్రశంసలను అందుకున్న‌ప్ప‌టికీ..   సినిమా మాత్రం ఆశించినంత ఫలితాన్ని ఇవ్వలేకపోయింది.

తాజాగా.. నాని ద్విపాత్రాభినయంలో మేర్లపాక గాంధీ రూపొందించిన‌ ‘కృష్ణార్జున యుద్ధం’లో సుబ్బలక్ష్మిగా కనిపించింది అనుపమ. ఈ సినిమా కూడా బాక్సాఫీస్ దగ్గర అనుకున్నంత‌గా సందడి చేయడం లేదు. మూడు వ‌రుస విజ‌యాల త‌రువాత‌.. బ్యాక్ టు బ్యాక్ ఫ్లాప్స్ రావ‌డంతో..  తన తదుపరి చిత్రాల‌పైనే ఆశలు పెట్టుకుంది ఈ ముద్దుగుమ్మ‌. వాటిలో ఒక‌టి.. సాయిధరమ్ తేజ్ హీరోగా న‌టిస్తున్న‌ ‘తేజు ది కూడా ఓ మంచి ప్రేమకథ’ (ప్రచారంలో ఉన్న పేరు) కాగా.. మ‌రొక‌టి రామ్‌తో చేస్తున్న 'హ‌లో గురు ప్రేమ కోస‌మే'.  మ‌రి.. వ‌రుస ప‌రాజ‌యాల‌తో ఉన్న అనుపమకి ఈ సినిమాలైనా ప్ల‌స్ అవుతాయేమో చూడాలి.