కళకి అవధులు గాని, భాషా భేదం గాని లేదని పక్క రాష్ట్రాల నుంచి వచ్చిన, వస్తున్న నటీమణులు తెలియజేస్తున్నారు. తెలుగు సినిమాలు చేస్తూ, తెలుగులో వారే సొంతంగా డబ్బింగ్ చెప్పుకుంటే.. ప్రేక్షకులు వారిని తెలుగు అమ్మాయిలుగా ట్రీట్ చేస్తారని భావించి ఈ భామలు తమ తమ క్యారెక్ట‌ర్స్‌ కి డబ్బింగ్ చెప్పుకోవడానికి కూడా వెనుకాడడం లేదు.

నిత్యమీనన్, అనుప‌మ ప‌ర‌మేశ్వ‌ర‌న్ లాంటి క‌థానాయిక‌లు ఇలా చేసి తెలుగు ప్రేక్షకులకు దగ్గర‌య్యారు. ఇప్పుడు వారి బాట‌లోనే నడుస్తున్నారు పవర్ స్టార్ పవన్ కళ్యాణ్ హీరోయిన్స్. కాస్త వివ‌రాల్లోకి వెళితే.. పవన్ కళ్యాణ్, త్రివిక్రమ్ శ్రీనివాస్ కాంబినేషన్లో వస్తున్న సినిమా 'అజ్ఞాతవాసి'. ఇందులో కీర్తి సురేష్‌, అను ఇమ్మాన్యుయేల్ హీరోయిన్లుగా న‌టిస్తున్నారు.

ఈ సినిమాకి ఈ మధ్యనే కీర్తి సురేష్ డ‌బ్బింగ్ చెప్పుకుంది. ఆ విష‌యాన్ని త‌న ట్విట్ట‌ర్ ఖాతాలో చెప్పుకొచ్చింది. ఇప్పుడు కీర్తి బాట‌లోనే వెళ్లి మ‌రో హీరోయిన్‌ అను ఇమ్మాన్యుయేల్ కూడా డబ్బింగ్ చెప్పుకుంది. ఈ విషయం అను ట్విట్టర్ ద్వారా తెలియజేసింది. ఇలా త్రివిక్ర‌మ్ సినిమాలో నటించిన ఇద్దరు హీరోయిన్స్ కూడా డబ్బింగ్ చెప్పుకోవడం ఇదే మొదటి సారి. వీరు చెప్పుకున్న డబ్బింగ్ ఎలా ఉందో తెలియాలంటే ఈ సినిమా విడుదల తేది జనవరి 10 వరకు ఆగాల్సిందే.