‘ఆచార్య’లో మరో స్టార్.. నిజ‌మెంత?
- IndiaGlitz, [Tuesday,February 02 2021]
మెగాస్టార్‌ చిరంజీవి టైటిల్‌ పాత్రలో నటిస్తోన్న చిత్రం 'ఆచార్య'. స్టార్ డైరెక్టర్‌ కొరటాల శివ దర్శకత్వంలో రూపొందుతోన్న ఈ చిత్రాన్ని శ్రీమతి సురేఖ కొణిదెల సమర్పణలో కొణిదెల ప్రొడక్షన్‌ కంపెనీ, మ్యాట్నీ ఎంటర్‌టైన్‌మెంట్‌ పతాకాలపై నిరంజన్‌ రెడ్డి, రామ్చరణ్ నిర్మిస్తున్నారు. ఈ సినిమాలో ‘సిద్ధ’ అనే పవర్‌ఫుల్ పాత్రలో మెగా పవర్స్టార్ రామ్చరణ్ నటిస్తోన్న సంగ‌తి తెలిసిందే. కాగా.. ఇప్పుడు మరో స్టార్ హీరో కూడా ఈ సినిమాలో క‌నిపించ‌బోతున్నాడ‌ని అంటున్నారు.
ఆ స్టార్ హీరో ఎవ‌రో కాదు.. క‌న్న‌డ స్టార్ కిచ్చా సుదీప్. చిరంజీవి, కిచ్చా సుదీప్ క‌లిసి న‌టించ‌డం కొత్తేమీ కాదు. చిరంజీవి 151వ చిత్రం.. హిస్టారిక‌ల్ మూవీ సైరా న‌ర‌సింహారెడ్డిలో కిచ్చా సుదీప్ చాలా కీల‌క‌మైన పాత్ర పోషించాడు. అదే స్నేహ‌బందంతో మ‌రోసారి ఆచార్య ఓ చిన్న అతిథి పాత్రలో కిచ్చా సుదీప్ క‌నిపిస్తార‌ని వార్త‌లు వినిపిస్తున్నాయి. మ‌రి ఈ వార్త‌ల‌పై మెగా క్యాంప్ ఏమైనా స్పందిస్తుందేమో చూడాలి.
దేవాదాయ శాఖ‌లో అవినీతి ప్ర‌శ్నించేలా రూపొందుతున్న ఈ చిత్రానికి సంబంధించిన టీజ‌ర్ రీసెంట్‌గా విడుద‌లై సెన్సేష‌న్ క్రియేట్ చేసింది. ప్రస్తుతం 'ఆచార్య' సినిమా చిత్రీకరణ దశలో ఉంది. ఇందులో రామ్ చ‌ర‌ణ్‌పై కీల‌క స‌న్నివేశాల‌ను ద‌ర్శ‌కుడు కొరటాల శివ చిత్రీక‌రిస్తున్నాడు. త్వ‌ర‌లోనే పూజా హెగ్డే కూడా యూనిట్‌తో జాయిన్ అవుతుంద‌ని టాక్‌. ఈ సినిమాను మే 13న ప్రపంచ వ్యాప్తంగా భారీ ఎత్తున విడుదల చేస్తున్నారు. ఎస్‌.తిరునావుక్కరసు సినిమాటోగ్రఫీ అందిస్తున్నారు.