అప్పుల ఊబిలో కూరుకుపోయిన ప్రైవేట్ రంగ విమాన సంస్థ జెట్ ఎయిర్‌వేస్ బుధవారం అర్ధరాత్రి నుంచి పూర్తిగా సేవలు నిలిపివేస్తున్నట్లు కీలక నిర్ణయం తీసుకున్న సంగతి తెలిసిందే. ఈ నిర్ణయం తీసుకున్న 24 గంటలు లోపే జెట్‌కు మరో ఎదురుదెబ్బ తగిలింది. గురువారం నాటి మార్కెట్‌లో ఒకట్రెండు కాదు ఏకంగా 30శాతం నష‍్టపోవడంతో భారీ ఎదురుదెబ్బ తగిలినట్లైంది. కాగా.. నలుగురుబిడ్డర్లు వాటాల కొనుగోలుకు ఆసక్తిగా ఉన్నారన్న అంచనాలున్నాయి. దీంతో జెట్ షేర్లు ప్రస్తుతం 26 శాతం నష్టంతో 179 వద్ద ట్రేడ్‌ అవుతోంది. అయితే ఇది మరింత మెరుగుపడితే ఎయిర్‌వేస్‌కు మంచి రోజులు వచ్చే అవకాశాలున్నాయని నిపుణులు చెబుతున్నారు.

ఇదిలా ఉంటే.. జెట్ ఎయిర్‌‌వేస్ సంక్షోభంలో తీసుకున్న నిర్ణయంతో ఇతర కంపెనీల సేవలకు డిమాండ్ అమాంతం పెరుగుతోంది. జెట్ షట్‌డౌన్ చేస్తున్నట్లు ప్రకటించిన అనంతర స్పైస్‌జెట్‌‌ తన విమాన సర్వీసులను సంఖ్యను మరింత పెంచేందుకు సన్నాహాలు చేస్తోంది. దీంతో ఈ కౌంటర్లో భారీగా కొనుగోళ్లు చేయడానికి బిడ్డర్లు ముందుకొస్తున్నారు. ఇప్పటికే స్పైస్‌జెట్ ఆరు విమాన సర్వీసులు దింపుతున్నట్లు ఓ ప్రకటనలో తెలిపింది. ఒక్క మాటలో చెప్పాలంటే జెట్‌ అప్పుల ఊబిలో కూరుకుపోవడంతో ఇటు స్పైస్‌ జెట్‌కు.. అటు ఇండిగో ఇంటర్‌గ్లోబ్ ఏవియేషన్‌‌కు మంచిరోజులు వచ్చాయన్న మాట.