விஜய் குடும்பத்தில் இருந்து திரைக்கு வரும் இன்னொரு நபர்
- IndiaGlitz, [Thursday,January 21 2016]
இளையதளபதி விஜய் நடித்து முடித்துள்ள 'தெறி' படத்தில் விஜய்யின் மகள் கேரக்டரில் நடிகை மீனாவின் மகள் நைனிகா நடித்துள்ளார் என்பது அனைவரும் அறிந்ததே. இந்நிலையில் இந்த படத்தில் விஜய்யின் மகள் திவ்யாவும் ஒரு முக்கிய கேரக்டரில் நடித்துள்ளதாகவும், சமீபத்தில் லடாக் பகுதியில் நடைபெற்ற 'தெறி' படத்தின் இறுதிக்கட்ட படப்பிடிப்பில் விஜய்யின் மகள் திவ்யா கலந்து கொண்டதாகவும் கூறப்படுகிறது.
விஜய்யின் மகளாகவே திவ்யா 'தெறி' படத்தில் நடித்துள்ளதாக தெரிகிறது. ஏற்கனவே விஜய் நடித்த 'வேட்டைக்காரன்' படத்தில் விஜய்யின் மகன் சஞ்சய் ஒரு பாடலுக்கு விஜய்யுடன் நடித்திருந்த நிலையில் தற்போது விஜய்யின் மகளும் திரையில் தோன்றுகிறார் என்பது குறிப்பிடத்தக்கது.
விஜய்யுடன் சமந்தா, எமிஜாக்சன், மொட்டை ராஜேந்திரன், மகேந்திரன் உள்பட பலர் நடித்து வரும் 'தெறி' படத்தை அட்லி இயக்கியுள்ளார். கலைப்புலி எஸ்.தாணு மிகுந்த பொருட்செலவில் தயாரித்துள்ள இந்த படம் வரும் தமிழ்ப்புத்தாண்டு தினத்தில் வெளியாகும் என எதிர்பார்க்கப்படுகிறது.