ബുള്ളറ്റ് വിശ്വനായി അനൂപ് മേനോൻ
- IndiaGlitz, [Tuesday,June 06 2017]
മോഹൻലാൽ ലാൽജോസ് ചിത്രം വെളിപാടിന്റെ പുസ്തകത്തിൽ അനൂപ് മേനോൻ അവതരിപ്പിക്കുന്നത് ഏറെ വ്യത്യസ്തമായ വേഷം. ബുള്ളറ്റ് വിശ്വൻ എന്ന മെക്കാനിക്കായാണ് അനൂപ് എത്തുന്നത്. തനി നാട്ടിൻപുറത്തുകാരനാണ് ബുള്ളറ്റ് വിശ്വൻ. കൊമ്പൻ മീശയും പിന്നിലേക്ക് ചീകിയ മുടിയും സിന്ദൂരപ്പൊട്ടുമൊക്കെയായി ഗെറ്റപ്പിലും വ്യത്യസ്തത പരീക്ഷിക്കുന്നുണ്ട് അനൂപ് മേനോൻ. കഴിഞ്ഞ ദിവസം അനൂപ് ഷൂട്ടിംഗിൽ ജോയിൻ ചെയ്തു. ലാൽജോസ് ചിത്രം വിക്രമാദിത്യനിൽ ഉണ്ണി മുകുന്ദന്റെ അച്ഛൻ വേഷം അവതരിപ്പിച്ച് അനൂപ് മേനോൻ ശ്രദ്ധ നേടിയിരുന്നു. മോഹൻലാലിനൊപ്പം ഒടുവിൽ അഭിനയിച്ച മുന്തരിവള്ളികളും ഹിറ്റായി.
വെളിപാടിന്റെ പുസ്തകത്തിന്റെ പ്രധാന ലൊക്കേഷൻ തുമ്പ സെന്റ് സേവ്യേഴ്സ് കോളേജാണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ചിത്രത്തിൽ അങ്കമാലി ഡയറീസ് ഫെയിം അന്നാ രാജനും പ്രിയങ്കാ നായരുമാണ് നായികമാരാകുന്നത്. സിദ്ദിഖ്, ശരത് കുമാർ, സലിംകുമാർ,അലൻസിയർ, സുബീഷ് സുധി തുടങ്ങിയവർ പ്രധാന വേഷങ്ങളിലെത്തുന്നു. തിരക്കഥ: ബെന്നി പി. നായരമ്പലം, ഛായാഗ്രഹണം: വിഷ്ണുശർമ്മ.