சென்னை அண்ணா சாலையில் உள்ள பிரபல பிரியாணி உணவகம் ஒன்றில் பணிபுரிந்த ஊழியர் ஒருவருக்கு கொரோனா உறுதியானதை அடுத்து அந்த கடையை போலீசார் மூடியதால் பெரும் பரபரப்பு ஏற்பட்டுள்ளது

சென்னை அண்ணா சாலையில் உள்ள புகழ்பெற்ற பிரியாணி உணவகம் ஒன்றில் பணிபுரிந்த ஊழியர் ஒருவருக்கு கடந்த 8ஆம் தேதி கொரோனா வைரஸ் குறித்த அறிகுறி இருந்ததை அடுத்து அவருக்கு பரிசோதனை செய்யப்பட்டது. பரிசோதனை முடிவில் அவருக்கு கொரோனா உறுதி செய்யப்பட்டதை அடுத்து, சுகாதாரத்துறை அதிகாரிகள், உணவக நிர்வாகத்திற்கு தகவல் தெரிவித்தனர். ஆனால் ஹோட்டல் நிர்வாகம் சம்பந்தப்பட்ட நபர் தற்போது அங்கு பணி புரியவில்லை என்று கூறி உணவகத்தை தொடர்ந்து நடந்து வந்தனர்.

இந்த நிலையில் இதுகுறித்து திருவல்லிக்கேணி காவல் நிலையத்தில் சுகாதாரத்துறையினர் புகார் அளித்த நிலையில் சுகாதாரத் துறையினர் மற்றும் காவல்துறையினர் உணவகத்திற்கு வந்து கொரோனாவால் பாதிக்கப்பட்ட நபர் குறித்து விசாரணை நடத்தினார். மேலும் உணவக ஊழியர்களுக்கும் காவல் துறையினருக்கும் வாக்குவாதம் நடந்ததை அடுத்து உணவகத்தின் கதவுகளை போலீசார் மூடி அடைத்தனர். மேலும் கொரோனா தொற்றுக்கான படிவத்தை உணவகத்தின் கதவுகளில் ஒட்டிச் சென்றதால் அந்த பகுதியில் சில மணி நேரம் பரபரப்பு ஏற்பட்டது