யுவன்ஷங்கர் ராஜாவின் 'அஞ்சு மணிக்கு' இன்று ரிலீஸ்!
- IndiaGlitz, [Thursday,September 05 2019]
பிரபல இசையமைப்பாளர் யுவன்சங்கர் ராஜா தான் இசையமைக்கும் படங்களில் மட்டுமின்றி பிற இசையமைப்பாளர்கள் கம்போஸ் செய்த பாடல்களையும் பாடி வருகிறார் என்பது தெரிந்ததே. சமீபத்தில் ’பிஸ்தா’ என்ற படத்தில் இசையமைப்பாளர் தரன் கம்போஸ் செய்த ஒரு பாடலை யுவன்சங்கர்ராஜா பாடினார் என்பது குறிப்பிடத்தக்கது.
இந்த நிலையில் அதே இசையமைப்பாளர் தரண் இசையில் உருவாகிவரும் ’பப்பி’ என்ற படத்தில் இடம்பெற்ற ’அஞ்சு மணிக்கு’ என்ற பாடலையும் யுவன்சங்கர் ராஜா சமீபத்தில் பாடினார் என்பது தெரிந்ததே. இந்த பாடலை கம்போஸ் செய்த உடன் இந்த பாடலை யுவன் பாடினால் மட்டுமே பொருத்தமாக இருக்கும் என்று தான் கருதியதாகவும் இதனை அடுத்து யுவனிடம் இது குறித்து பேசியபோது டியூனை கேட்டதும் உடனே பாட ஒப்புக் கொண்டதாகவும் அவருடன் மீண்டும் மீண்டும் இணைந்து பணிபுரிவது தனக்கு ஒரு சுகமான அனுபவம் என்றும் இசையமைப்பாளர் தரண் தெரிவித்தார்.
‘பப்பி’ படத்தில் இடம்பெற்ற ‘அஞ்சு மணிக்கு என்ற இந்த பாடலை யுவன்ஷங்கர் ராஜாவுடன் இணைந்து சாஷா திரிபாதி பாடியுள்ளார் என்பதும் இந்த பாடல் உள்பட இந்த படத்தின் அனைத்து பாடல்களையும் மிர்ச்சி விஜய் எழுதியுள்ளார் என்பது குறிப்பிடத்தக்கது. யுவன்ஷங்கர் ராஜா பாடிய ’அஞ்சு மணிக்கு’ என்ற பாடல் விரைவில் வெளியாகும் என ஏற்கனவே அறிவிக்கப்பட்டிருந்த நிலையில் தற்போது இந்த பாடல் இன்று மாலை 5 மணிக்கு வெளியாகும் என்று அறிவிக்கப்பட்டுள்ளது. யுவன் சங்கர் ராஜாவின் காந்தக்குரலில் வெளியாக இருக்கும் இந்த பாடலை கேட்க அவரது ரசிகர்கள் காத்திருக்கின்றனர் என்பது குறிப்பிடத்தக்கது.