நடிகர் கவின் நடிக்கும் அடுத்த படத்தில் அனிருத் இசையமைப்பார் என்று அறிவிக்கப்பட்டிருந்த நிலையில், தற்போது திடீரென அவர் அந்த படத்தில் இருந்து விலகி விட்டதாக கூறப்படுகிறது.

தென்னிந்திய திரையுலகின் முன்னணி இசையமைப்பாளர்களில் ஒருவரான அனிருத், கமல், ரஜினி, விஜய், அஜித் என முன்னணி நடிகர்களின் படங்களுக்கு இசையமைத்து வருகிறார். இந்த நிலையில், கவின் நடிக்கும் 'கிஸ்' படத்திற்கு அனிருத் இசையமைப்பார் என்று அறிவிக்கப்பட்டிருந்த நிலையில், தற்போது அந்த படத்தில் இருந்து அவர் விலகி விட்டதாக கூறப்படுகிறது.

அனிருத் விலகியதை அடுத்து, 'கிஸ்' படத்திற்கு தற்போது ஜென் மார்ட்டின் இசையமைப்பாளராக பொறுப்பேற்று இருப்பதாக தகவல் வெளியாகியுள்ளது. கவின் நடித்த ’பிளடி பெக்கர்’ திரைப்படம் சமீபத்தில் வெளியான நிலையில், இந்த படத்திற்கு இசையமைத்தவர் தான் ஜென் மார்டின் என்பதும், கவின் தான் இவரை 'கிஸ்' படத்திற்கான சிபாரிசு செய்தார் என்றும் கூறப்படுகிறது.

ரோமியோ பிக்சர்ஸ் நிறுவனம் தயாரித்து வரும் 'கிஸ்' படத்தில் கவின் நாயகனாக நடித்து வரும் நிலையில், இந்த படத்தின் படப்பிடிப்பு தற்போது விறுவிறுப்பாக நடைபெற்று வருவதாகவும், இன்னும் சில மாதங்களில் இந்த படப்பிடிப்பு முடிவடைவும் எனவும் கூறப்படுகிறது.

சதீஷ் இயக்கத்தில் உருவாகி வரும் இந்த படம் முழுக்க முழுக்க ரொமான்ஸ் மற்றும் காமெடி கதை அம்சம் கொண்டது என்றும் கூறப்படுகிறது