விஷாலின் அடுத்த படத்தில் இணைந்த அனிருத்
- IndiaGlitz, [Friday,April 01 2016]
விஷால், ஸ்ரீதிவ்யா நடிப்பில் 'கொம்பன்' இயக்குனர் முத்தையா இயக்கியுள்ள 'மருது' திரைப்படத்தின் படப்பிடிப்பு சமீபத்தில் முடிவடைந்தது என்பதை ஏற்கனவே பார்த்தோம். இந்த படம் வரும் மே மாதம் ரிலீஸ் ஆகும் என எதிர்பார்க்கப்படும் நிலையில் இந்த படத்தின் போஸ்ட் புரடொக்ஷன்ஸ் பணிகள் விறுவிறுப்பாக நடைபெற்று வருகிறது.
இந்நிலையில் இந்த படத்திற்காக ஒரு புதிய பாடல் தற்போது ஒலிப்பதிவு செய்யப்பட்டுள்ளது. டி.இமான் இசையமைத்துள்ள இந்த பாடலை பிரபல இசையமைப்பாளர் அனிருத் பாடியுள்ளார். இவர் ஏற்கனவே இமான் இசையமைத்த 'நீ என்ன பெரிய அப்பாடக்கரா' என்ற பாடலை 'என்னமோ ஏதோ' படத்திற்காக பாடியுள்ளார் என்பது குறிப்பிடத்தக்கது. தற்போது விஷாலுக்காக அனிருத் பாடியுள்ள இந்த பாடலும் 'அப்பாடக்கர்' பாடலை போலவே சூப்பர் ஹிட் ஆகும் என எதிர்பார்க்கப்படுகிறது.
'இது ஒரு கிராமிய பாடல் என்று தனது சமூக வலைத்தளத்தில் கூறியுள்ள நடிகர் விஷால், விரைவில் இந்த படத்தின் ஃபர்ஸ்ட்லுக் வெளியாகும் என்றும் அறிவித்துள்ளார்.
விஷால், ஸ்ரீதிவ்யா, ராதாரவி, சூரி, ஆர்.கே.சுரேஷ் உள்ளிட்ட பல நடிகர்கள் நடித்துள்ள இந்த படத்திற்கு வேல்ராஜ் ஒளிப்பதிவு செய்துள்ளார். விஷாலின் 'விஷால் பிலிம் பேக்டரி' இந்த படத்தை தயாரித்துள்ளது.