பிரபல இயக்குனர் சுசீந்திரன் தயாரிப்பில் உருவாகி வரும் 'வில் அம்பு' படத்தில் இடம்பெற்ற ஒரு சிங்கிள் டிராக் சமீபத்தில் இணையதளத்தில் வெளியாகி மாபெரும் ஹிட்டாகியது என்பது தெரிந்ததே. அனிருத் இணைந்த பாடிய 'ஆள சாய்ச்சுப்புட்ட' என்ற இந்த பாடலை விஷால் இணையதளத்தில் வெளியிட்டார். இளம் இசையமைப்பாளர் அனிருத் குரலில் வெளிவந்த இந்த பாடல் சமூகவலைத்தளங்களில் டிரெண்டாகியது என்பது குறிப்பிடத்தக்கது.

இதையடுத்து இதே படத்திற்கு இளம் இசையமைப்பாளர்களில் முன்னணியில் இருக்கும் ஜி.வி.பிரகாஷும் ஒரு பாடலை பாடியுள்ளார். மதன் கார்க்கி எழுதிய 'குறும்படமே' என்று தொடங்கும் இந்த பாடலை ஜி.வி.பிரகாஷ், வந்தனா ஸ்ரீனிவாசனுடன் இணைந்து பாடியுள்ளார்.

மேலும் அனிருத், ஜி.வி.பிரகாஷை தொடரந்து இந்த படத்தில் இடம்பெற்றுள்ள இன்னொரு பாடலான 'நீயும் அடி நானும்' என்ற பாடலை இசையமைப்பாளர் டி.இமான், ஏ.வி.பூஜாவுடன் இணைந்து பாடியுள்ளார். இந்த படத்தின் இசையமைப்பாளர் நவீன், மூன்று இசையமைப்பாளர்களை பாட வைத்து சாதனை செய்துள்ளதாக கூறப்படுகிறது.

ரமேஷ் சுப்பிரமணியம் இயக்கி வரும் இந்த படத்தில் ஹரிஷ் கல்யாண், ஸ்ரீ மற்றும் பலர் நடித்து வருகின்றனர். த்ரில் மற்றும் சஸ்பென்ஸ் கலந்த 'வில் அம்பு' திரைப்படம் விரைவில் வெளியாகவுள்ளது.