உலக நாயகன் கமல்ஹாசன் நடிப்பில் பிரம்மாண்ட இயக்குனர் ஷங்கர் இயக்கத்தில் லைக்கா நிறுவனத்தின் தயாரிப்பில் அனிருத் இசையில் உருவாகி வரும் திரைப்படமான ’இந்தியன் 2’படத்தின் அடுத்தகட்ட படப்பிடிப்பு சமீபத்தில் தொடங்கி சென்னை, ராஜமுந்திரி போன்ற பகுதிகளில் நடைபெற்று வருகிறது. கமல்ஹாசன் உள்பட படக்குழுவினர் இந்த படப்பிடிப்பில் கலந்து கொண்டனர்.

இந்த நிலையில் இந்த படத்தில் ஏற்கனவே பல பிரபல நடிகர், நடிகைகள் நடித்து வரும் நிலையில் தற்போது மேலும் ஒரு பாலிவுட் பிரபலம் இணைந்துள்ளார். ஆம், இந்த படத்தில் பிரபல பாலிவுட் நடிகர் அனில்கபூர் இணைந்துள்ளதாக செய்திகள் வெளிவந்துள்ளது. அனில்கபூர் ஏற்கனவே ஷங்கரின் ‘முதல்வன்’ படத்தின் இந்தி ரீமேக்கான ‘நாயக்’ என்ற படத்தில் நடித்துள்ளார் என்பது குறிப்பிடத்தக்கது. ‘இந்தியன் 2’ படத்தில் அனில்கபூரின் கேரக்டர் என்ன என்பது இன்னும் சில நாட்களில் தகவல் வெளிவரும் என எதிர்பார்க்கப்படுகிறது.

கமல்ஹாசன், காஜல்அகர்வால், ரகுல் பிரீத்திசிங், பிரியா பவானிசங்கர், சித்தார்த், பாபி சிம்ஹா, விவேக், வித்யூத் ஜம்வால், சமுத்திரகனி, டெல்லி கணேஷ், உள்பட பலர் நடித்து வரும் இந்த படத்திற்கு அனிருத் இசையமைத்து வருகிறார். ரத்னவேலு ஒளிப்பதிவில்,ஸ்ரீகர் பிரசாத் படத்தொகுப்பில் உருவாகி வரும் இந்த படம் பிரமாண்டமான பட்ஜெட்டில் தயாராகி வருகிறது. மேலும் இந்த படத்தை வரும் 2021 ஆம் ஆண்டு ஏப்ரல் மாதம் வெளியிட படக்குழுவினர் திட்டமிட்டுள்ளனர்.