கமல்ஹாசன் நடிக்க உள்ள ’தலைவன் இருக்கிறான்’ என்ற திரைப்படம் குறித்த தகவல்கள் அவ்வப்போது வெளிவந்து கொண்டிருப்பதை பார்த்து வருகிறோம். ’தேவர் மகன்’ படத்தின் இரண்டாம் பாகமாக உருவாகும் இந்த படத்தில் நாசரின் மகன் கேரக்டரில் விஜய் சேதுபதி நடிக்க உள்ளதாக செய்திகள் வெளிவந்தது தெரிந்ததே.

இந்த நிலையில் இந்த படத்தில் இரண்டு நாயகிகள் நடிக்க இருப்பதாக தற்போது செய்திகள் வந்து கொண்டிருக்கின்றன. ’தலைவன் இருக்கின்றான்’ படத்தில் கமல்ஹாசனுக்கு ஜோடியாக ஆண்ட்ரியா மற்றும் பூஜா குமார் நடிக்க இருப்பதாக கூறப்படுகிறது. ஏற்கனவே இவர்கள் இருவரும் ’விஸ்வரூபம்’ மற்றும் ’உத்தம வில்லன்’ ஆகிய படங்களில் கமல்ஹாசனுடன் இணைந்து நடித்துள்ளனர் என்பது குறிப்பிடத்தக்கது.

மேலும் இந்த படத்தில் வடிவேலு முக்கிய கேரக்டரில் நடிக்க உள்ளார் என்றும் முதல் பாகத்தில் நடித்த ரேவதியும் ஒரு கேரக்டரில் நடிக்கவுள்ளதாகவும் கூறப்படுகிறது. ராஜ்கமல் பிலிம்ஸ் இண்டர்நேஷனல் மற்றும் லைக்கா நிறுவனமும் இணைந்து தயாரிக்கும் இந்தப் படத்தின் படப்பிடிப்பு லாக்டவுன் முடிந்தவுடன் தொடங்கும் என்று எதிர்பார்க்கப்படுகிறது.