రామ్ చరణ్, సమంత నాయకానాయికలుగా తెరకెక్కిన చిత్రం ‘రంగస్థలం’. బ్రిలియంట్ డైరెక్టర్ సుకుమార్ దర్శకత్వం వహించారు. మైత్రీ మూవీ మేకర్స్ నిర్మించిన ఈ చిత్రానికి దేవిశ్రీ ప్రసాద్ స్వరాలు సమకూర్చారు. అనసూయ, ఆది, జగపతిబాబు, ప్రకాష్ రాజ్ ప్రధాన పాత్రల్లో సంద‌డి చేయ‌నున్నారు. ఇదిలా ఉంటే.. తొలుత ఈ సినిమాలో అనసూయ పాత్ర కోసం ‘కుమారి 21ఎఫ్’ హీరోయిన్ హెబ్బా పటేల్‌ను సంప్రదించిందంట చిత్ర బృందం. కొన్ని కారణాల వలన ఆమె ఈ అవ‌కాశం వదులుకోవడంతో అనసూయను ఎంపిక చేశారు. ముందు అనసూయ కూడా నిరాకరించినా.. కథ పూర్తిగా విన్న తర్వాత ఓకే చెప్పారని సమాచారం.

అంతేకాదు.. ఈ సినిమాలో కథానాయిక పాత్ర పోషించిన సమంత పాత్ర‌తో సమానంగా అనసూయ పాత్ర ఉంటుందని చిత్ర వర్గాలు వెల్లడిస్తున్నాయి. రంగమ్మగా అనసూయ పాత్ర సినిమాకే ప్రత్యేక ఆకర్షణగా నిలుస్తుందని.. సినిమాని మరో స్థాయికి తీసుకువెళ్తుందని స‌మాచారం. కొన్ని చోట్ల రామలక్ష్మి (చిత్రంలో సమంత పాత్ర పేరు)ని డామినేట్ చేస్తూ ఈ పాత్ర సాగుతుందని కూడా పేర్కొంటున్నాయి. అంటే.. ఈ నెల 30 తర్వాత (చిత్రం విడుదల తేదీ) మ‌రిన్ని మంచి పాత్రలు అనసూయను వెతుక్కుంటూ వస్తాయన‌డంలో ఎటువంటి సందేహం లేద‌న్న మాట‌.