బిజీగా పుష్పరాజ్.. రంగంలోకి రంగమ్మత్త!
- IndiaGlitz, [Thursday,July 08 2021]
ఐకాన్ స్టార్ అల్లు అర్జున్ నటిస్తున్న పాన్ ఇండియా చిత్రం 'పుష్ప' షూటింగ్ తిరిగి ప్రారంభం అయింది. రెండు రోజుల క్రితమే దర్శకుడు సుకుమార్ హైదరాబాద్ శివారు ప్రాంతంలో ఈ చిత్ర షూటింగ్ ని రీస్టార్ట్ చేశారు. మిగిలిన భాగం షూటింగ్ పూర్తి చేసి ఈ ఏడాదే పుష్ప మొదటి భాగాన్ని ప్రేక్షకుల ముందుకు తీసుకువచ్చేందుకు ప్రయత్నాలు చేస్తున్నారు.
పుష్ప ఎప్పుడు రిలీజ్ అవుతుందనేది షూటింగ్ ఎంత వేగంగా ఫినిష్ అవుతుందనే అంశంపై ఆధారపడి ఉంటుంది. మైత్రి మూవీస్ సంస్థ నిర్మాణంలో తెరకెక్కుతున్న ఈ చిత్రంపై అంచనాలు ఏస్థాయిలో ఉన్నాయో ప్రత్యేకంగా చెప్పనవసరం లేదు. ఇప్పటికే విడుదలైన ఫస్ట్ లుక్ టీజర్ కు అద్భుతమైన రెస్పాన్స్ వచ్చింది.
ఇదిలా ఉండగా కోవిడ్ సెకండ్ వేవ్ ప్రభావం తగ్గుతుండడంతో టాలీవుడ్ సినిమాల షూటింగ్స్ తిరిగి ప్రారంభం అయ్యాయి. పుష్ప చిత్రంలో నటి, యాంకర్ అనసూయ కీలక పాత్రలో నటిస్తున్న సంగతి తెలిసిందే. గురువారం అనసూయ పుష్ప షూటింగ్ లో జాయిన్ అయింది.
ఈ విషయాన్ని అనసూయ సోషల్ మీడియా వేదికగా తెలిపింది. పుష్ప లొకేషన్ పిక్ ని అభిమానులతో పంచుకుంది. 'బ్యాక్ తో వర్క్.. పుష్ప' అని పోస్ట్ చేసింది. రంగస్థలం చిత్రంలో అనసూయ రంగమ్మత్త పాత్రని అంత త్వరగా మరిచిపోలేం. రంగస్థలం చిత్రంలో అనసూయ రోల్ చాలా కీలకంగా నిలిచింది.
దీనితో పుష్పలో కూడా సుకుమార్ అనసూయకు పవర్ ఫుల్ పాత్రే ఇచ్చి ఉంటారనే ఊహాగానాలు వినిపిస్తున్నాయి. పుష్ప చిత్రం ఎర్రచందనం స్మగ్లింగ్ బ్యాక్ డ్రాప్ లో తెరకెక్కుతోంది. అల్లు అర్జున్ సరసన ఈ చిత్రంలో రష్మిక హీరోయిన్ గా నటిస్తోంది. దేవిశ్రీ ప్రసాద్ సంగీత దర్శకుడు.