தளபதி விஜய் நடித்த இந்த ஆண்டின் மிகப்பெரிய எதிர்பார்ப்பை ஏற்படுத்தியுள்ள 'மெர்சல்' திரைப்படம் உலகம் முழுவதும் வரும் தீபாவளி தினத்தில் வெளியாகவுள்ளது. இந்த படத்திற்கான முன்பதிவு ஒருசில திரையரங்குகளில் தொடங்கிவிட்டது. 

இந்த நிலையில் விலங்குகள் நல வாரியம் இன்னும் இந்த படத்திற்கான தடையில்லா சான்றிதழ் அளிக்காததால் தயாரிப்பாளருக்கு சென்சார் சர்டிபிகேட் இன்னும் கிடைக்கவில்லை. இந்த நிலையில் ஒவ்வொரு வாரமும் புதன்கிழமை மட்டுமே கூடும் விலங்குகள் நல வாரியத்தின் போர்டு உறுப்பினர்கள் கூட்டம் இன்று காலை 10 மணிக்கு 'மெர்சல்' படத்திற்கு தடையில்லா சான்றிதழ் வழங்குவது குறித்து முடிவெடுக்க கூடவுள்ளதாக செய்திகள் வெளிவந்துள்ளது.

இந்த கூட்டத்தில் நல்ல முடிவு எடுக்கப்பட்டால் 'மெர்சல்' திரைப்படம் மெர்சலாக உலகம் முழுவதும் தீபாவளி விருந்தாக திரைக்கு வரும் என்பது குறிப்பிடத்தக்கது.