கோலிவுட் திரையுலகில் ஒரே நேரத்தில் அதிக படங்களில் நடித்து கொண்டிருக்கும் ஒருசில நடிகர்களில் ஒருவர் ஜி.வி.பிரகாஷ். இசையமைப்பு, நடிப்பு என இரண்டு துறைகளிலும் பேலன்ஸ் செய்து பயணம் செய்து வரும் ஜி.வி.பிரகாஷ் நடிப்பில் உருவான 'செம' திரைப்படம் இம்மாதம் 25ஆம் தேதி வெளியாகிறது.

இந்த நிலையில் 'த்ரிஷா இல்லைனா நயன்தாரா' இயக்குனர் ஆதிக் ரவிச்சந்திரன் இயக்கத்தில் மீண்டும் ஜிவி பிரகாஷ் நடிக்கவுள்ளதாக வெளிவந்த செய்தியினை ஏற்கனவே பார்த்தோம். தற்போது இந்த படத்தின் நாயகி குறித்த தகவல் வெளிவந்துள்ளது. ஜாக்கிசான் நடித்த 'குங்பூ யோகா மற்றும் தனுஷ் நடித்த 'அனேகன்' போன்ற படங்களில் நடித்த அம்ரியா தஸ்தூர் இந்த படத்தின் நாயகியாக நடிக்க ஒப்பந்தமாகியுள்ளார். இந்த தகவலை ஜிவி பிரகாஷ் தனது சமூக வலைத்தளத்தில் உறுதி செய்துள்ளார்.

ஃபேண்டஸி 3D படமாக உருவாகவிருக்கும் இந்த படத்தில் நடிக்கும் மற்ற நட்சத்திரங்கள் மற்றும் தொழில்நுட்ப கலைஞர்கள் தேர்வு நடைபெற்று வருவதாகவும் இந்த படத்தின் படப்பிடிப்பு விரைவில் தொடங்கவிருப்பதாகவும் கூறப்படுகிறது.