விண்வெளித் துறையில் புதிய சாதனை படைத்த அமெரிக்கா!!! Spacex நிறுவனத்தின் மதிப்பு கூடுகிறது!!!
- IndiaGlitz, [Monday,June 01 2020]
அமெரிக்கா கடந்த 2011 க்குப் பிறகு சர்வதேச விண்வெளி நிலையத்திற்கு ஆட்களை அனுப்பும் திட்டங்களை கைவிட்டு இருந்தது. விண்கலத்தின் தயாரிப்புக்கு பெரும்பாலும் உலக நாடுகள் ரஷ்யாவை நாட வேண்டிய தேவையே இதற்கு காரணமாகச் சொல்லப்பட்டது. தற்போது தனியார் நிறுவனமான Spacex நிறுவனம் தயாரித்த விண்கலத்தில் நாசா வீரர்கள் இரண்டு பேர் சர்வதேச விண்வெளி நிலையத்திற்குப் பத்திரமாக அனுப்பப் பட்டனர். கடந்த புதன்கிழமை Spacex நிறுவனம் தயாரித்த விண்கலம் பால்காம் – 9 ராக்கெட் மூலமாக விண்வெளிக்கு அனுப்பும் கவுண்டன் தொடங்கப்பட்டது. ஆனால் கடைசி நேரத்தில் மோசமான வானிலை காரணமாக இந்தத் திட்டம் நிறுத்தப்பட்டது. அதையடுத்து இந்திய நேரப்படி சனிக்கிழமை இரவு இந்த விண்கலம் கவுண்டன் ஆரம்பிக்கப்பட்டு பத்திரமாக விண்ணை நோக்கி பறந்தது.
நாசா வீரர்களான டக் ஹர்லி மற்றும் பாப் பெஹன்கென் ஆகியோர் முதல்முறையாக காப்சூல் வடிவில் தயாரிக்கப் பட்ட விண்கலத்தில் பயணம் செய்தனர். கசிவு, அழுத்தம், வெப்பநிலை போன்ற பல்வேறு கட்ட சோதனைகளுக்குப் பிறகு இந்த விண்கலம் தனது வெற்றிப் பாதையைத் தொடங்கியது. தற்போது விண்கலம் சர்வதேச விண்வெளி நிலையத்துடன் இணைக்கப் பட்டதாகவும் ஏற்கனவே அங்கிருந்த ரஷ்யா மற்றும் அமெரிக்க விஞ்ஞானிகள் புதிய விண்வெளி வீரர்களை வரவேற்றதாகவும் செய்திகள் வெளியாகி இருக்கிறது.
அமெரிக்காவின் ஃப்ளோரிடா மாகாணத்தில் உள்ள லாஜ் ஏன்ஜெல்ஜின் கென்னடி விண்வெளி நிலையத்தில் இருந்து விண்கலம் தனது பயணத்தைத் தொடங்கியது எனவும் சரியாக 19 மணி நேரம் பயணம் செய்து சர்வதேச விண்வெளி நிலையத்துடன் இணைக்கப்பட்டதாகவும் Spacex நிறுவனம் அறிக்கை வெளியிட்டு இருக்கிறது. விண்கலத்தின் வடிவமைப்புக்கும் தயாரிப்புக்கும் அதிகபடியான பணம் செலவாவதைத் தடுக்கும் வகையில் Spacex நிறுவனம் புதிய கேப்சூல் வடிவிலான விண்கலத்தை தயாரித்து இருக்கிறது. இந்தத் தயாரிப்பு ரஷ்யாவின் தயாரிப்பை விட மிகவும் விலை மலிவு என்பதையுத் தற்போது சர்வதேச ஊடகங்கள் விவாதித்து வருகின்றன. தனியார் நிறுவனம் விண்கல தயாரிப்பில் புதிய சாதனையை படைதிருப்பதைத் தொடர்ந்து அந்நிறுவனத்தின் தலைமை நிர்வாக இயக்குநர் எலான் மஸ்க்கு பாராட்டுகள் குவிந்து வருகின்றன.