జనసేనకు గుండెకాయ లాంటి నేతగా పేరుగాంచిన సీబీఐ మాజీ జేడీ లక్ష్మీ నారాయణ ఆ పార్టీకి రాజీనామా చేసిన సంగతి తెలిసిందే. అయితే ఆయన రాజీనామా చేస్తారని కానీ.. రాజీనామా చేసిన తర్వాత ఆ పార్టీ అధినేత పవన్ కల్యాణ్‌పై ఇలాంటి ఆరోపణలు చేస్తారని బహుశా పవన్, కార్యకర్తలు ఊహించి ఉండరేమో.! ఆయన వ్యాఖ్యలతో కార్యకర్తలు హర్ట్ అయ్యారు. తాజాగా ఈ వ్యవహారంపై ప్రముఖ నిర్మాత, బీజేపీ నేత అంబికాకృష్ణ స్పందించారు. లక్ష్మీనారాయణ ఎత్తిచూపిన కారణం సహేతుకంగా లేదన్నారు.

తప్పేముంది!?

‘వృత్తిని కొనసాగిస్తే అందులో తప్పుపట్టడానికి ఏముంటుంది..?. ఆనాడు నందమూరి తారక రామారావు గారు ముఖ్యమంత్రిగా కొనసాగుతూ సినిమాలు చేయలేదా? ఎందుకంటే అదే వారి వృత్తి. ఆ వృత్తిలో ఎదిగే జనాల ముందుకు రాగలిగారు. పవన్ మరిన్ని సినిమాల్లో నటించాలని నేను కోరుకుంటున్నాను. ఇలాంటి విషయాలేవీ పట్టించుకోవద్దు. పవన్ గారు మీరు చక్కగా సినిమాల్లో నటించండి. అటు ప్రజా సేవ కూడా చేయండి. మీకెప్పుడూ మేం అండగా ఉంటాం’ అని అంబికా చెప్పుకొచ్చారు.