Ambati Rayudu: జనసేనలోకి అంబటి రాయుడు.. పవన్ కల్యాణ్‌తో భేటీ..
- IndiaGlitz, [Wednesday,January 10 2024]
ఏపీ రాజకీయాలు ఏ క్షణం ఎలాంటి మలుపులు తిరుగుతాయో ఊహించడం కష్టమౌతోంది. ఎవరూ ఎప్పుడూ ఏ పార్టీలో చేరతారో అర్థం కావడం లేదు. తాజాగా వైసీపీకి రాజీనామా చేసిన టీమిండియా మాజీ క్రికెటర్ అంబటి రాయుడు జనసేన కండువా కప్పుకునేందుకు సిద్ధమైనట్లు సమాచారం. ఆ పార్టీ అధినేత పవన్ కల్యాణ్‌తో రాయుడు భేటీ అయ్యారు. తాజా రాజకీయాలపై పవన్‌తో చర్చించిన రాయుడు.. జనసేనలో చేరేందుకు గ్రీన్ సిగ్నల్ ఇచ్చినట్లు తెలుస్తోంది.
క్రికెటర్‌గా సత్తా చాటిన రాయుడు కొద్ది కాలంగా రాజకీయాల్లోకి వచ్చేందుకు ఇంట్రెస్ట్ చూపుతున్నారు. ఈ క్రమంలోనే ఆయన వైసీపీలో చేరేందుకు ప్రయత్నించారు. గుంటూరు ఎంపీ సీట్ ఆశించిన ఆయన.. ఆ పార్లమెంట్ నియోజకవర్గాల్లో పర్యటించారు. అనంతరం ఇటీవల సీఎం జగన్ సమక్షంలో వైసీపీ కండువా కప్పుకున్నారు. అయితే ఏమైందో ఏమో కానీ వారం రోజుల్లోనే ఆ పార్టీకి రాజీనామా చేస్తున్నట్లు ప్రకటించారు. దీంతో వైసీపీలో ఒక్కసారిగా కలవరం రేగింది.
గుంటూరు ఎంపీ సీట్ ఆశించిన రాయుడుకు.. మచిలీపట్నం లేదా వైజాగ్ ఎంపీ అభ్యర్థిగా పోటీ చేయాలని జగన్ సూచించినట్లు చెబుతున్నారు. అయితే అందుకు ఇష్టపడని రాయుడు ఏకంగా పార్టీకి బై బై చెప్పేశారు. అయితే తాను వైసీపీకి ఎందుకు రాజీనామా చేయాల్సి వచ్చిందో చెబుతూ రాయుడు క్లారిటీ ఇచ్చారు. ‘జనవరి 20 నుంచి దుబాయ్ వేదికగా జరిగే ఐఎల్టీ20లో ముంబై ఇండియన్స్‌కి ప్రాతినిధ్యం వహిస్తున్నాను. ప్రొఫెషనల్ ఆటలో ఆడేందుకు నాకు రాజకీయాలతో ఎలాంటి సంబంధమూ ఉండకూడదు. అందుకే నేను వైసీపీకి రాజీనామా చేసినట్లు’ పేర్కొన్నారు.
కానీ తాజాగా పవన్ కల్యాణ్‌తో భేటీ కావడం ఏపీ రాజకీయ వర్గాల్లో తీవ్ర చర్చనీయాంశంగా మారింది. తెలుగుదేశం, జనసేన పార్టీల ఉమ్మడి అభ్యర్థిగా గుంటూరు పార్లమెంట్ నుంచి పోటీలోకి దిగుతారని ప్రచారం జరుగుతుంది. కాపు సామాజిక వర్గానికి చెందిన రాయుడు కాపు నాయకుడు పెట్టిన పార్టీలో చేరితే రాజకీయంగా తనకు భవిష్యత్ ఉంటుందని ఆలోచిస్తున్నట్లు ఆయన సన్నిహితులు చెబుతున్నారు. దీంతో త్వరలోనే రాయుడు జనసేనలో చేరడం ఖాయంగా వెల్లడిస్తున్నారు.