விஜய் நடித்துள்ள 'புலி' படத்தில் விஜய்க்கு அடுத்தபடியாக முக்கியத்துவம் வாய்ந்த கேரக்டர் என்றால் அது ஸ்ரீதேவி கேரக்டர்தான் என படக்குழுவினர் அனைவரும் கூறி வரும் நிலையில், ஸ்ரீதேவியே இந்த படத்திற்கு அதிக முக்கியத்துவம் கொடுத்துள்ளது தற்போது தெரிய வந்துள்ளது. அது எந்த அளவுக்கு என்றால், தன்னுடைய சமூக வலைத்தளத்தில் 'ஸ்ரீதேவி போனிகபூர்' என்று இருந்த தன்னுடைய பெயரை தற்போது 'ஸ்ரீதேவி புலிகபூர்' என்று மாற்றி வைத்துள்ளார். அந்த அளவுக்கு புலி' திரைப்படம் அவரை கவர்ந்துள்ளதாக கூறப்படுகிறது.

மேலும் ஸ்ரீதேவிக்காக படக்குழுவினர்களும் தங்களுடைய அதிகப்படியான ஒத்துழைப்பை கொடுத்துள்ளதாகவும் செய்திகள் வெளிவந்துள்ளது. அவர் இந்த படத்தில் நடிக்க கேட்ட மிகப்பெரிய சம்பளம், அவர் விரும்பிய மேக்கப்மேன், அவருடைய கேரக்டருக்கு அதிகப்படியான முக்கியத்துவம் மற்றும் அவர் போட்ட அனைத்து கண்டிஷன்களுக்கும் புலி படக்குழு சம்மதித்துள்ளதாக கூறப்படுகிறது.

தமிழ், தெலுங்கு மற்றும் இந்தி என மூன்று மொழிபேசும் மாநிலங்களிலும் ஸ்ரீதேவி பிரபலமாக இருப்பதால் அவரது பெயர் இந்த படத்தின் வியாபாரத்திற்கு பெரிதும் உதவியாக இருக்கும் என நம்பப்படுகிறது. இந்நிலையில் அவர் தனது சமூக வலைத்தளத்திலேயே 'புலி'யின் பெயருடன் தன்னுடைய பெயரை இணைத்து கொண்டதே இந்த படத்திற்கு ஒரு மிகப்பெரிய விளம்பரமாக கருதப்படுகிறது.