நெல்லையில் சிவகார்த்திகேயன் நடித்த 'அமரன்’ திரைப்படம் திரையிடும் தியேட்டரில் வெடிகுண்டு வீசியதாக வெளிவந்திருக்கும் தகவல் பெரும் அதிர்ச்சியை ஏற்படுத்தியுள்ளது.

சிவகார்த்திகேயன் மற்றும் சாய் பல்லவி நடிப்பில், ராஜ்குமார் பெரியசாமி இயக்கத்தில், ஜிவி பிரகாஷ் இசையில், உலக நாயகன் கமல்ஹாசன் தயாரிப்பில் உருவான 'அமரன்’ திரைப்படம் கடந்த தீபாவளி அன்று வெளியாகி மிகப்பெரிய வெற்றி பெற்றது. இந்த படம் உலகம் முழுவதும் 300 கோடி வசூல் செய்திருப்பதாக கூறப்படுகிறது.

இந்த நிலையில், இந்த படத்தில் சில காட்சிகள் சர்ச்சைக்குரியவாக இருக்கிறது என்று சில அமைப்புகள் கடந்த சில நாட்களாக போராட்டம் நடத்தி வரும் நிலையில், 'அமரன்’ திரைப்படம் திரையிடப்படும் தியேட்டர்கள் முன் ஆர்ப்பாட்டம் நடத்தியதால் பரபரப்பு ஏற்பட்டது.

இந்த நிலையில், நெல்லையில் உள்ள ஒரு தியேட்டரில் 'அமரன்’ திரைப்படம் திரையிட்டுக் கொண்டிருக்கும் நிலையில், அந்த தியேட்டரின் வாசலில் வெடிகுண்டு வீசப்பட்டதாகவும், பெட்ரோல் வெடிகுண்டை வீசிய மர்ம நபர்கள் மீது போலீசார் வழக்கு பதிவு செய்து விசாரணை செய்து வருகின்றனர் என்றும் தகவல் வெளியாகியுள்ளது. மேலும் அந்த பகுதியில் உள்ள சிசிடிவி காட்சிகளின் அடிப்படையில் வெடிகுண்டு வீசியது யார் என்பதை கண்டுபிடிக்க போலீசார் தீவிரமாக உள்ளனர் என்பது குறிப்பிடத்தக்கது