பாலிவுட் செல்லும் மற்றொரு முன்னணி தமிழ் நடிகை
- IndiaGlitz, [Sunday,July 22 2018]
பாலிவுட் திரையுலகில் இருந்து பல நடிகைகள் கோலிவுட் பக்கம் படையெடுத்து வந்து கொண்டிருக்கும் நிலையில் கோலிவுட்டின் பிரபல நடிகை ஒருவர் பாலிவுட் பட வாய்ப்பை பெற்றுள்ளார். அவர்தான் அமலாபால்.
'மைனா' படம் மூலம் தமிழ் ரசிகர்களின் மனதை கவர்ந்த அமலாபால் அதன்பின்னர் பல வெற்றிப்படங்களில் தமிழில் நடித்து கொண்டிருக்கும் நிலையில் தற்போது பாலிவுட் இயக்குனர் நரேஷ் இயக்கத்தில் அமலாபால் ஒரு இந்தி படத்தில் நடிக்கவுள்ளார். இந்த படத்தில் அர்ஜூன் ரம்பால் ஹீரோவாக நடிக்கவுள்ளார் என்பது குறிப்பிடத்தக்கது.
இதுகுறித்து அமலாபால் கூறியபோது, 'பாலிவுட்டில் இருந்து கடந்த சில வருடங்களாக பல வாய்ப்புகள் எனக்கு வந்தாலும் ஒரு சரியான கேரக்டருக்காக காத்திருந்தேன். இயக்குனர் நரேஷ், நான் நடித்த ஒருசில தமிழ்ப்படங்களில் எனது நடிப்பை பார்த்து அவரது அடுத்த படத்தின் கதைக்கு நான் பொருத்தமாக இருப்பேன் என்று கணித்துள்ளார். அவரை நேரில் சந்தித்து கதை மற்றும் எனது கேரக்டர் குறித்து கேட்டவுடன் திருப்தியான நான் இந்த படத்தில் நடிக்க ஒப்புக்கொண்டேன்.
இந்த படம் எனக்கு பாலிவுட்டில் ஒரு நல்ல அறிமுகமாக இருக்கும் என்று நம்புகிறேன். வரும் அக்டோபரில் இந்த படத்தின் படப்பிடிப்பு தொடங்கவுள்ளது என்று அமலாபால் கூறியுள்ளார்.