சூப்பர் ஸ்டாரை அடுத்து சூர்யா படத்தில் இணைந்த பிரபல நாயகன்
- IndiaGlitz, [Sunday,May 13 2018]
நடிகர் சூர்யா நடிப்பில் இயக்குனர் கே.வி.ஆனந்த் இயக்கவுள்ள திரைப்படத்தில் கேரள சூப்பர் ஸ்டார் மோகன்லால் முக்கிய வேடத்தில் நடிக்கவுள்ளார் என்று வெளிவந்த செய்தியை ஏற்கனவே பார்த்தோம். இந்த நிலையில் இந்த படத்தில் மேலும் ஒரு பிரபல நடிகர் இணைந்துள்ளார். அவர்தான் தெலுங்கு நடிகர் அல்லு சிரிஷ். இவர் பிரபல தெலுங்கு நடிகர் அல்லு அர்ஜூன் சகோதரர் என்பது குறிப்பிடத்தக்கது.
சூர்யா படத்தில் அல்லு சிரிஷ் இணையவுள்ளதை இந்த படத்தின் தயாரிப்பு நிறுவனமான லைகா புரடொக்சன்ஸ் நிறுவனம் தனது சமூக வலைத்தளத்தில் உறுதி செய்துள்ளது. சூர்யா, மோகன்லால், அல்லு சிரிஷ் என மூன்று பெரிய நடிகர்கள் இந்த படத்தில் இருப்பதால் தமிழகம், கேரளம், ஆந்திரா மற்றும் தெலுங்கானா ஆகிய மாநிலங்களில் இந்த படம் ஹிட்டாகும் என எதிர்பார்க்கப்படுகிறது.
இந்த படத்தில் நடிக்க வாய்ப்பு கிடைத்தது குறித்து அல்லு சிரிஷி கூறியபோது, 'நான் சூர்யாவின் மிகப்பெரிய ரசிகன். சமூக வலைத்தளத்தில் என்னுடைய பல ரசிகர்கள் எப்போது சூர்யாவுடன் நடிக்க போகிறீர்கள் என்று கேள்வி கேட்டுக்கொண்டிருந்தனர். இந்த நிலையில் சூர்யாவுடன் நடிக்க வாய்ப்பு கொடுத்த இயக்குனர் கே.வி.ஆனந்த் அவர்களுக்கு எனது நன்றிகள்' என்று கூறியுள்ளார்.
இந்த படத்தின் நாயகி உள்பட மற்ற நடிகர், நடிகை தேர்வு நடைபெற்று வருவதாகவும், விரைவில் படக்குழுவினர் குறித்த விரிவான தகவல் வெளிவரும் என்றும் கூறப்படுகிறது.