అల.. బ‌న్నీ డేట్ ఫిక్స్
- IndiaGlitz, [Monday,September 23 2019]
స్టైలిష్ స్టార్ తాజా చిత్రం 'అల..వైకుంఠ‌పుర‌ములో..' చిత్రీక‌ర‌ణ ద‌శ‌లో ఉంది. త్రివిక్ర‌మ్ శ్రీనివాస్ ద‌ర్శ‌కుడు. ఈ సినిమా వ‌చ్చే ఏడాది సంక్రాంతికి విడుదల అవుతుంద‌ని చిత్ర యూనిట్ అధికారికంగా ప్ర‌క‌టించిన సంగతి తెలిసిందే. అయితే లేటెస్ట్ స‌మాచారం ప్ర‌కారం ఈ సినిమా రిలీజ్ డేట్ ఫిక్స్ అయిన‌ట్లు సినీ వ‌ర్గాల స‌మాచారం. ఈ మేర‌కు సినిమాను వ‌చ్చే ఏడాది జ‌న‌వ‌రి 12న విడుదల చేస్తార‌ని టాక్‌. ఇప్ప‌టికే విడుద‌లైన ఈ సినిమా టైటిల్ ప్రొమో, పోస్టర్ అన్నీ సినిమాపై అంచ‌నాల‌ను తీసుకువ‌చ్చాయి. అల్లు అర్జున్, త్రివిక్ర‌మ్ శ్రీనివాస్ కాంబినేష‌న్‌లో రూపొందుతోన్న హ్యాట్రిక్ చిత్ర‌మిది.
పూజా హెగ్డే హీరోయిన్‌గా న‌టిస్తోన్న ఈ చిత్రంలో ట‌బు కీల‌క పాత్ర పోషిస్తుంది. జ‌య‌రాం, ముర‌ళీశ‌ర్మ త‌దిత‌రులు ఇత‌ర కీల‌క‌పాత్ర‌ల్లో న‌టిస్తున్నారు. గీతాఆర్ట్స్‌, హారిక అండ్ హాసిని క్రియేష‌న్స్ బ్యాన‌ర్‌పై అల్లు అరవింద్, ఎస్‌.రాధాకృష్ణ ఈ చిత్రాన్ని నిర్మిస్తున్నారు. ఓ కోటీశ్వ‌రుడి బిడ్డ పేద‌వాడుగా, పేద‌వాడి కొడుకు కోటీశ్వ‌రుడిగా పెరుగుతారు. త‌ద‌నంత‌ర ప‌రిస్థితులు ఎలా మారుతాయ‌నేదే ఈ సినిమా క‌థాంశమ‌ని కూడా వార్త‌లు విన‌ప‌డుతున్నాయి.
జులాయి, స‌న్నాఫ్ స‌త్య‌మూర్తి చిత్రాల త‌ర్వాత బ‌న్నీ, త్రివిక్ర‌మ్ కాంబినేష‌న్‌లో రూపొందుతోన్న చిత్రం కావ‌డంతో సినిమాపై భారీ అంచ‌నాలే నెల‌కొన్నాయి. 'నా పేరు సూర్య నా ఇల్లు ఇండియా' సినిమా త‌ర్వాత గ్యాప్ తీసుకున్న బ‌న్ని ఈ సినిమాను చేస్తున్నాడు.