స్టైలిష్ స్టార్ అల్లు అర్జున్‌‌కు ‘జులాయి’, ‘సన్నాఫ్ సత్యమూర్తి’ లాంటి సూపర్ హిట్ చిత్రాలిచ్చిన మాటల మాంత్రికుడు తివిక్రమ్ మరో సినిమాను తెరకెక్కిస్తున్న విషయం తెలిసిందే. ఇప్పటి వరకూ ఈ చిత్రానికి పేరు మాత్రం పెట్టలేదు. పలు పేర్లు మాత్రం అటు తివిక్రమ్.. ఇటు బన్నీ అభిమానులు సూచిస్తున్నారు. అయితే తాజాగా ఓ టైటిల్ ఫిక్స్ అయినట్లు వార్తలు పెద్ద ఎత్తున వస్తున్నాయి.

ఫ్యామిలీ ఎంటర్టైనర్‌గా వస్తున్న ఈ చిత్రం.. తండ్రీ కొడుకుల అనుబంధానికి సంబంధించిన కథాంశమని తెలుస్తోంది. ఈ సినిమాకి ‘నాన్న.. నేను’ అనే టైటిల్‌ను పరిశీలిస్తున్నారని విశ్వసనీయ వర్గాల సమాచారం. ఈ టైటిల్ దాదాపు ఖరారు చేసినట్లు తెలుస్తోంది. అయితే అధికారికంగా మాత్రమే ప్రకటించాల్సి ఉందని అభిమానులు పెద్ద ఎత్తున ప్రచారం చేస్తున్నారు.

కాగా.. ఈ చిత్రంలో అల్లు అర్జున్ సరసన పూజా హెగ్డే, నివేదా పేతురాజ్ నటిస్తున్న సంగతి తెలిసిందే. కాగా.. ఈ సినిమాలో అల్లు అర్జున్ తల్లి పాత్రలో ‘టబు’ నటిస్తున్నట్లు ఇదివరకే చిత్రబృందం ప్రకటించింది. అంతేకాదు.. ఈ చిత్రంలో మరో కీలక పాత్రలో సంగీతను తీసుకున్నట్లు ప్రచారం జరుగుతోంది. ఇదిలా ఉంటే ఇప్పటివరకూ ఈ తివిక్రమ్-బన్నీ కాంబోలో వచ్చిన రెండు సినిమాలు సూపర్ డూపర్ హిట్టయ్యాయి. అయితే త్వరలో రాబోతున్న సినిమా హ్యాట్రిక్ అవుతుందో లేదో వేచి చూడాల్సిందే మరి.