భారతీయ సినిమాలకు ఇప్పుడు అంతర్జాతీయంగా క్రేజ్ పెరుగుతోంది. ఇది ఎప్పటి నుంచో జరుగుతున్నదే అయినా.. ఇటీవలి కాలంలో దంగల్, ఆర్ఆర్ఆర్ వంటి సినిమాలు విదేశాల్లోనూ సత్తా చాటి బ్లాక్‌బస్టర్‌లుగా నిలిచాయి. ఇప్పుడు పుష్ప వంతు వచ్చింది. సుకుమార్ దర్శకత్వంలో అల్లు అర్జున్ హీరోగా తెరకెక్కిన ఈ సినిమా సృష్టించిన సంచలనాలు అన్నీ ఇన్నీ కావు. దేశం మొత్తం పుష్ప పాటలు, డైలాగ్స్‌తో ఊగిపోయింది. ఈ మధ్యకాలంలో సమాజంపై ఈ స్థాయిలో ప్రభావం చూపిన సినిమా మరొకటి లేదంటే అతిశయోక్తి కాదేమో. సామాన్యుల నుంచి ప్రముఖుల వరకు తగ్గేదే లే అంటూ గడ్డం కింద చెయ్యి పెట్టి డైలాగ్ చెప్పారు.

ప్రమోషన్స్ కోసం రష్యాకు చేరుకున్న అల్లు అర్జున్- రష్మిక:

ప్రస్తుతం రీ రిలీజ్‌ల ట్రెండ్ నడుస్తుండటంతో కేరళలలోని అల్లు అర్జున్ ఫ్యాన్స్ ఈ మూవీ స్పెషల్ షోలు ప్రదర్శించేందుకు సిద్ధమయ్యారు. ఈ నేపథ్యంలో తెలుగులోనూ రీరిలీజ్ జరుగుతుందని భావిస్తున్నారు. అభిమానులు దీనిపై చర్చించుకుంటూ వుండగానే... వారికి శుభవార్త చెప్పారు మేకర్స్. పుష్ప పార్ట్ 1ని డిసెంబర్ 8న రష్యాలో రీరిలీజ్ చేస్తున్నట్లు అనౌన్స్ చేశారు. అంతేకాదు .. ఈ మూవీ ప్రమోషన్ కోసం పుష్ప యూనిట్ రష్యా వెళ్లనుంది. డిసెంబర్ 1న మాస్కోలో, డిసెంబర్ 3న సెయింట్ పీటర్స్‌బర్గ్‌లో ప్రెస్‌మీట్‌లు నిర్వహించనున్నారు.

ఇప్పటికే మాస్కో ఇంటర్నేషనల్ ఫిల్మ్ ఫెస్టివల్‌లో స్క్రీనింగ్:

మాస్కో ఇంటర్నేషనల్ ఫిల్మ్ ఫెస్టివల్‌లో ఈ సినిమాను రష్యన్ సబ్ టైటిల్స్‌తో ప్రదర్శించిన సంగతి తెలిసిందే. దీనికి మంచి రెస్పాన్స్ రావడంతో రష్యన్ భాషలో డబ్బింగ్ చేసి విడుదల చేస్తామని యూనిట్ ప్రకటించింది. ఏదేమైనా మన తెలుగు సినిమా రష్యన్ భాషల్లోకి అనువాదమై రిలీజ్ అవుతుండటం తెలుగు వారందరికీ గర్వకారణం.

ప్రారంభమైన పుష్ప 2 షూటింగ్ :

మరోవైపు.. పుష్ప 2 షూటింగ్ ఇటీవలే ప్రారంభమైన సంగతి తెలిసిందే. బ్యాంకాక్‌లో రెండు వారాల పాటు చిత్రీకరణ జరిగే అవకాశం వుంది. అక్కడి అడవుల్లో రెండ్రోజుల పాటు కీలక సన్నివేశాలను చిత్రీకరించనున్నారట. స్నేహితుని పెళ్లి కోసం దక్షిణాఫ్రికా వెళ్లిన బన్నీ.. అక్కడి నుంచి నేరుగా బ్యాంకాక్‌లోని చిత్ర యూనిట్‌ను కలుస్తారట. తొలి పార్ట్ మాదిరే క్రిస్మస్ సీజన్‌లోనే పుష్ప ది రూల్‌ని రిలీజ్ చేస్తారని ఫిలింనగర్‌లో గుసగుసలు వినిపిస్తున్నాయి.