స్టైలిష్ స్టార్ అల్లు అర్జున్, కేర‌ళ కుట్టి అను ఇమ్మాన్యుయేల్ జంటగా నటిస్తున్న‌ చిత్రం ‘నా పేరు సూర్య నా ఇల్లు ఇండియా’. రచయిత వక్కంతం వంశీ దర్శకత్వం వహిస్తున్నారు. దేశభక్తి నేపథ్యంలో తెరకెక్కుతున్న ఈ సినిమాలో బన్నీ ఆర్మీ ఆఫీసర్‌గా కనిపించనున్నారు. ఇదిలా ఉంటే.. ఈ సినిమాలో ఓ ప్రత్యేకమైన గీతాన్ని ఎటువంటి డాన్స్ మూమెంట్స్ లేకుండా తెరకెక్కించారట. కీలకమైన సన్నివేశంలో వచ్చే ఈ పాట.. అర్ధవంతమైన సందేశంతో ప్రేక్షకులను ఆకట్టుకుంటుందంట.

ఈ పాటను స్వీడన్ మోడల్, బాలీవుడ్ నటి అయిన ఎల్లి అవ‌ర్రామ్, బన్నీలపై చిత్రీకరించారని తెలిసింది. బన్నీతో పాటంటే చాలా థ్రిల్ ఫీల్ అయ్యాయని, అయితే.. డాన్స్ మూమెంట్స్ ఏమీ లేవని, ఇది ఐటెం సాంగ్ మాత్రం కాదని చెప్పుకొచ్చింది ఎల్లి  అవ‌ర్రామ్. బాలీవుడ్ మూవీ ‘క్వీన్’కు రీమేక్ గా తమిళంలో కాజల్ అగర్వాల్ ప్రధాన పాత్రధారిణిగా రూపొందుతున్న ‘పారిస్ పారిస్’ చిత్రంలో ఎల్లి  అవ‌ర్రామ్ కీలకపాత్ర పోషిస్తోంది. ఇదిలా ఉంటే..  మే 4న‌ ‘నా పేరు సూర్య’ ప్రేక్ష‌కుల ముందుకు రానుంది.