'புஷ்பா 2’ திரைப்படம் ரிலீஸான தியேட்டரில் ஏற்பட்ட கூட்ட நெரிசலால் உயிரிழந்த பெண் தொடர்பான வழக்கில், நடிகர் அல்லு அர்ஜுனுக்கு 14 நாட்கள் நீதிமன்ற காவல் என நீதிபதி உத்தரவிடப்பட்டுள்ள விவகாரம் பரபரப்பை ஏற்படுத்தியுள்ளது.

கடந்த ஐந்தாம் தேதி, புஷ்பா 2 திரைப்படம் வெளியானபோது, ஹைதராபாத்தில் உள்ள ஒரு திரையரங்கில் ரேவதி என்ற பெண் தனது கணவர், குழந்தையுடன் படம் பார்க்க சென்றார். அந்த சமயத்தில் தியேட்டருக்கு அல்லு அர்ஜுன் வந்ததால் ஏற்பட்ட கூட்ட நெரிசலில் ரேவதி பரிதாபமாக உயிரிழந்தார். இதுகுறித்து போலீசார் வழக்குப்பதிவு செய்து, திரையரங்க உரிமையாளர் மற்றும் மேலாளர் உள்பட மூவரை கைது செய்தனர்.

இந்த நிலையில் இந்த சம்பவத்தில் அல்லு அர்ஜுன் மீதும் வழக்குப்பதிவு செய்யப்பட்டு இருந்ததால் இன்று காலை அவர் கைது செய்யப்பட்டார். அவரிடம் விசாரணை நடத்திய பின்னர் அவர் நீதிமன்றத்தில் ஆஜர்படுத்தப்பட்ட நிலையில் அவருக்கு 14 நாட்கள் நீதிமன்ற காவல் விதிக்கப்பட்டது. மருத்துவ பரிசோதனை முடிவடைந்த பிறகு, அவர் சிறையில் அடைக்கப்பட உள்ளதாக தகவல் வெளியாகியுள்ளது.

நடிகர் அல்லு அர்ஜுன் கைது தெலுங்கு திரையுலகிலும், அவரது ரசிகர்களிடையிலும் அதிர்ச்சியையும் பரபரப்பையும் ஏற்படுத்தியுள்ளது.